Nu a khawngheup ( Mother's Day)

"Lungnakung Nu ce qihchah hamna tueng hue" Awicueih 11:16

Nu a Khawngheup ( Mother's Day) ve anik doer lo thlang khawyah a awm a dawngoeh a betca ka yawk lo ni. Ave a konglam ni yawk ve ni ti mantoe amsava hlue hue. Cenamoe ve a betca yaksaknakna ka yawk lona awm hue.May hla a yar-hihnak yarpi oeh ak awmlo hlue, ni cun noeh anik caana Nu qihchahnak ang huep a hamna ni.

"Ka Nu aw, Na Capa na lungnak oeh na aok hlue aa hluekhi ka caa a aa hlue tinoeh, naak thaa ak awm boeih hona noeh, na Capa a hamna na poek aih uet oeh khuikhat patang, na yaa na yuh awm ampoek noeh, na aa hlue, na aok hluekhi boeih ka Capa hamna tinoeh kho na poeknak ve, u mueih ak thlang eng num am mhih hlue tha hue. Ka Nasen oeh nak qang khui oeh ngairhep eng ni ihsak noeh, buh cawih tui ngah a sim kaana nani kur nani khlep ve, u mueih eng num phu ani thung hlue tha hue" Ka Nu Ka Nu , Na xinglu sang seh, Na yo do seh, Na sa dip seh!!!

Nu a khawngheup ak khuui-(Mother's Day History )

Nu a khawngheup (Mother's Day ) tive miting poh unoeh ve ang huep seh ti unoeh ani poh lo amni hue. Nu khawnghuepna ani yoeih lonak ve ak khuuina toe Jesuh Mdek khan oeh a lo hlan oeh anina cut hoh ni.

Nu a hamna khawnghuep anina honak ve Jesuh Mdekkhan oeh a lo hlan 300 BC tluk oeh ana cut lo hoh hue.Nu a khawngheup ( Mother's Day) ve Greek thlangkhi eng "Rhea" ani ti u, Greek ramna koe khawsakhi boeih a nu, moe Rom thlangkhi eng khawsakhi a nu " Cybele" a hamna yoeihnak anina honak oehkoeng anang tuenlo hoh hue.Ningnih Khrihca thlangvang engtoe Jesuh a nu Mary simnakna ana holona hue u. Cenamoe England rhamkhina toe Nu khiboeih a hamna ti unoeh yarpi mat ce ana holona hue u.

Amerika natoe Anna Reeves Jarvis eng a tuen oehkoeng cut noeh kum 150 hla ana holona hoh hue u.Anih eng a tuen oeh ve Nu a bibinak khawngheup ( Mother's Work Day" ti hue. Amerika natoe Nu a khawnghuep ve May hla a yart-hihnak oeh, Amerika President Woodrow Wilson eng ang hatlaknak a mueihna holona hue u. Ace ce Anna Jarvis ( 1864- 1948) eng Nu a hamna khawnghuep yoeih hamna Ca-khi rhek noeh ak khuepueihnak ak cam eng ani holonak u ni.

Kum 1905 oeh Anna Jarvis eng a thih taak a Canu Anna Maria Jarvis eng a Nu eng a xing khui oeh ikoe mueihna num a khuikhat tice simnakna ana holona hue.Anna ve a Nu Anna Jarvis eng a xing hui oeh yartpi oeh Nasen congnak oeh ve mueihna am mtheh ce ak kawpoek oeh awm hue," Ngaih-u doena cuekcahnak ta nueng, huep oet , kut oet oehtoe Nu simnak a khawnghuep ve yoeih law hlue hue u.Pa a hamna khawngheup khawyah yoeih moe usoenum , Nu a hamna toe awmhlan hue" ti hue.

Acoeh koe eng Anna boi mat John Wannamaker, moe khawrham ukkung Taft moe Roosevelt ce Nu-khi khyihchahnak a khawnghuep a poh ce bom hamna ni xuehkhi hue.Ace ak cueknak ce 1908 oeh Anna eng a Nu ak thi ce a simpoenak a hamna West Virgina oehkoe a Baekim (Church) nace a Nu eng a xinghui oeh a lungnak paipai bok bi noeh cet hue. Paipai bok ve thlangbok awi natoe "White Carnations" ti hue u, nimoeh bae natoe ikoe huvoeinum amsim hue nueng. A coeh koeng kho kum 5 a lo oehtoe ace paipai ak bok ce Nu a khawnghuep noeknakna holona hue u. Anna eng Nu a hamna khawnghuep poh hamna tueng hue tinoeh thamahnak a taaknak a mueihna kum 1914 oehtoe America ukkung boi (President )Woodrow Wilson eng Nu a hamna khawngheup ve thlangboeih eng yoeih hamna tueng hue tinoeh hatlaknak anatalo hue.

Ak cuek oehtoe Nu a khawngheup ( Mother's Day) ve Baek-im na pumnak hamna, Ani Nu a venna Ca yawk noeh jelnak awi qoelnak hamna, Ca hah, thaem, moe Paipai eng ani Nu kut donak a hamna ana holona hue u.A ce mueihna thlangboeih eng ani holonak Anna eng a huh oehtoe Nu a khawngheup ( Mother's Day) ak cam eng thlangkhi a ni sum ani thaem vak lon ha hue tinoeh, Nu a khawngheup ( Mother's Day) ce koeh poh voel a hamna kum 1923 oeh poeknak ana talo hue.A thih hlan Kum 1848 oeh Anna Jarvis eng a ve mueihna Nu a hamna khawngheup( Mother's Day ana poh lo ve yut hue nueng ti hue.

Cenamoe thlangboeih eng amnol tha unoeh ani Canu Capa khi eng, tuh doena May hla a yarhhihnak oehtoe ani Nu avenna cet unoeh a ning tlon aning pan rhunak oeh long a lamkhi na thlang khinna ak cet amsava hue.

Khawsa awi Baibul khui oehtoe ve mueih khi eng ve Khawsa eng ani paekkhi Nu simnakna ni hona tha hue.

Awicueih 11:16
Awicueih 23:25
Isaiah 49:15
Isaiah 66:13
Kalati 4:26

Ak noerkhi boeih ak khan oeh Pa Khawsa eng na Nu na lungnak tha a hamna kawpoek ni peseh tice ka cuekcahnak ni.

Dairamtlang News