President Thai Tloek Buh Vaennak

*****************************

Tuhngoi toe Myanmar President ak khyuem tloek tla law soe ak thai tloek xum cunnak moe buh vaennak ta hue u. 

Ikoe mueihna num uknak a awm lo hlue hue, tlahtlaengnak ikoe mueih tlukna num ani poh lo hlue u, kho rham diingnoeh uknak laek lawnoeh a voetvaikhi, ak coi ak camkhi moe thlang khuikhakhi eng ani hai kho a hamna ikoe mueihna num a do lo hlue lang huvoei soe. 1988 oehkoe eng cutnoeh thlang boeih eng a ning ngaih-u moe ni hu kum tuehnak oeh thlang boeih eng ang ngaih-u ve imueihna num ang sut losak hlue, nina teok lak ve u.

Dairamtlang News

Khawhleu eng Baekim Buuk Rhup Hue

*********************************************

Yanoeh Mizoram na khawhleu xer noeh Khawhleu eng Khawbel Presbyterian Baekim buuk rhup hue. Baekim ak khuina ak awm thaemkhi boeih awm khawyah sae hue. 

Myanmar Rham Xuikung  Khrihca Thlang  7

**************************************************

Myanmar rham Bukdah 80% a awmnak khui oeh Khrihca thlang eng ve mueihna Khawsa yawkdonak ni huh tha ve uem ham awm soeih hue. 

1). Pa Henry Van Thio
(Myanmar Vice President-2)

2).Dr Khin Aung Myint
(Amyota Hluttaw Chairman

3). Salai Lian Luai
(Chin State CM)

4). Daw Nan Khin Htwe Myint
(Kayin State CM)

5). Dr Khet Aung
(Kachin State CM)

6). Mann Jonny
(Irrawady Division CM)

7). Dr Le Le Maw
(Taningthari Division CM)

Myanmar kho  Buddhist 98% a awmnak rham oeh Khawsa eng Khrihca yawkdonak pe law hoh hue. Hailam oeh ave nak oeh a laeknak a hamna cuekcahnak ni tak hamna awm hue. 

Nukdoem Aung San Suu Kyi amoeh awm a Nasen oeh a Nu ce Khrihca na awmnoeh Khrihca phungna ana awmlo a mueihna a Va awm Khrihca vana noeh a Caakhi awm Khrihcana awm hue. Khrihca tive ak kawkhuina koe eng cu am mhih ti huvoei tinoeh poek hue nueng.

Dairamtlang News

Rhalkapkhi A Rhaih Ak Huukhi

Rhaikap ve kum 60 khui oeh a rhaih amna hulaw khoei na mueih hue u. Cenamoe tuhngoi oehtoe rhalkap eng Nukdoem Aung San Suu Kyi moe kut anim mtuu rhu hui oeh rhalkap a rhaih ak huukhi eng "tuhni rhalkap a rhaih ka huh lo hue, ace mueihna rhai oem u seh, ace mueihna rhai noeh thlang ak kawpoek ak ta eng cu 2008 xoisoi rhunak upade awm thlah thana ammak awm hlue num" ti unoeh mhlatnak ca yawk hue u.

Thlang vang engtoe am mkha oeh ak rhai yap ni ak kawkhuina cu a toeng ni a toengnak hue ti unoeh mhlatnak ta ba hue u. Tuh oehkoe mueihna 1990 oeh uknak pe rhi soe Kachin rham nakoe Phakant lungxing cu nawm Taluk a koena koengphloeh noeh ni kho ni rham a laeknakna awm voei soe ti unoeh qoel hue u. 

Thlang vang bai engtoe U Myint Shwe ce rhalkap ani a dawngoeh a hai thim hlak hlak vik hue, ang hoi ang mang awm amlaw hue, am mda am dang eng aok aa amkop hue, ikoe hlue ani cehtak huet unum ti unoeh ti hue u. 

Kai a huhnak  oehtoe ikoe mueihna awm vik soeyom tuhngoi oeh mik-hai hlamna uknak ani kut msum tha u ve uem ham soeih soeihna awm hue tinoeh poek hue nueng. 

Dairamtlang News

President Thein Sein eng President Thai Htin Kyaw Uknak Pe Hoh Hue

Tuhngoi a khawnghuep ve uem ham taktakna awm hue. 1988 oehkoe eng cutnoeh thlang khawyah mikphli hapcak, buh aok an aa kana, khuikha patang unoeh ak thi ak tlu, thawngkhui ak pha amsava hue. 

Rhalkap a uk hui, Than Shwe moe Thein Sein eng ani uk hui oeh im a lo kana ak khuikha amsava hue. Ace ni poek oeh tuhngoi toe Rhapkap uknak moe Democracy ang xaanak(a khawrhi) ang heup tina ni a awm hue. 

http://livestream.com/accounts/7228455/events/4442869 

President Thai Awikamnak

**********************

Thlang boeih eng kum khawrhuet (kum 50 tluk) khui oeh ani nang ngaih-u President ce tuhngoi ngoilam Myanmar khawnoek 10:00 oeh Aung San Suu Kyi a xuisoi NLD uknak hlue eng Awikamnak ta hoh hue u. 

Ace awikamnak oeh ve President U Htin Kyaw, Vice-President U Myint Shwe moe Vice-President U Henry Van Thio tloek ve ukkungna awm hlue hoh hue u. Khawngoi April hla 1, 2016 oehkoe engtoe Myanmar President ak thai ni ta hlue hoh noeh NLD eng ang caanak moe poh vang bi vang a tiikhi awm a bi a pohnak hlue a tuem cutnak awm hlue hoh hue. 

Myanmar President Awikamnak

Dairamtlang Awithang

Aye Maung A Rhonak moe Arakan Rham

************************************************

Tuhtloek Myanmar rham khui oeh awithang ak suehue sahak toe Yakhine rham ukkung hamna NLD a coyah eng U Ngi Puh anik tuehnak oeh ce Yakhine rham khui oeh ni hu kum noengnak ak hu ANP (Yakhine) Party amma ni ngahnak a ning dangsaknak ni.

U Aye Maung moe a bi bi pueikhi eng animoehkhi eng Yakhine Vuanci ce ani bi ani ngah a dawngoeh NLD eng ak tueh ce amngah hue u. Ani ngahnak toe Federal rhamna NLD eng a ngah takna a tlak oehtoe Yakhine rham a hamna cu Yakhine animoehkhi ANP party ak noeng eng animoeh moe animoeh eng tuehnak ta unoeh Yakhine Vuanci ce tuek u seh ti ni.

Yakhinekhi a ti mueihna ni ti mantoe Upade 436 a thlah kana ikoe mueihna ani poh hlue tha u. Yakhinekhi a ti mueihna toe 2008 xuisoinak upade a thlah kaana Aung San Su Kyi awm President bi voei tinak ni.

2008 upade 436 oehtoe "Vuanci ce President eng ni ak tueh hlue hue" tinoeh awm hue. Ace a thlah kaana ikoe mueihna num animoeh moe animoeh eng Vuanci tueh hamna ani ngahnak huvoei? Veve Aye Maung a rhonak matna awm hue. 2008 upade thlah unoeh Federal uknak a hamna upade ak laekna ani poh daeng oeh Yakhine rham doeng amni soe Pyine boeih eng animoeh moe animoeh rham a hamna Vuanci tuehnak thana awm hlue hue.

Khawmdek Khan Oeh Khawk-aa-jih Ang Xoi Soeih

*********************************************************

Mdek khan oeh khawk-aa-jih ang xoi soeih ve Taluk rham Gansu pyine oeh awm hue. Lam ce Khawk-aa-jih eng dah khoep soe Mawtawkhi awm ang hlipna ni ani ceh hue u. Ve Khawk-aa-jih ang xoi soeih ve Taluk rham Umbrella Company eng a pohna awmnoeh anglung oehkoe eng nim mcop soe 23 meters lawnoeh ang sang ce 14.4 meters na sang hue.

Lung Khan Oehkoe Thlang khawleh

*****************************

Lung khan oeh thlang khawleh ak awm moe Khyin ak khyum a khongleh ak awm nanik hukhoeikhi huvoei num. Veve Thailand rhamna koe Lung khan oeh thlang a khawngleh ak awm ni. 

Ave mueihna Lung khan oeh Khyin a khawngleh ak awm ve Kachin rham, Phakant tungna Khawika ani ti kho/ mhaw mat oehtoe Lung khan oeh Ui a khawleh khawyah awm hue. Ace a dawngoeh ace kho ming ce Khawika ani tina awm hue. Kachin awina Khawi= Ui, Ka= khawleh= Khawika= Ui a khawleh tinakna awm hue. Ace kho ce Uikhawleh kho tinak ni. 

Ave mueihna Lung khan oeh Khyin a khawleh ak awm ve nimoeh Dai khawmdek oehtoe Koica kho oeh awm hue ana ti hue u. Ace Koica kho oehkoe toe Sakkhi khawleh, moe ak changkhi awm om hue ana ti hue u. Ak sim nani awm oehtoe ak cerna ti lawlah u. 

 

Dairamtlang News

Boi Nor eng A Canu Boih Ak Lo

Thailand rhamna boi ak nor mat eng boi am khoi oehkoe a huh eng a Canu sengim kaihsak soe a Canu eng boih lo hue. Ace a Canu eng ikoe mueih tlukna num ka Pa eng ani teok hue tinoeh a nuk poek oeh boi am khoinakna a khawkung oeh bawk hue. 

Boikhi, mangkhi eng ani Caa ani Naa ani comnak anglak oeh thlang khuikha eng ani Caa ani teok ve ikoe mueih tlukna num phu a taak hue tive a Canu eng yasim hue. A Canu eng a uem aih uet oeh a khawkung oeh angbawk ve kawpoekna naa hue.

Aung San Suu Kyi Eng Vuanci Huen Pupphli Bi Hue

*****************************************

Aung San Suu Kyi eng ak tung tloek Vuanci huen pupphli a bi ve uem hamna awm chim hue. A bi hlue tloek pupphli ve Rhamchang Vuanci, President Yung Vuanci, Cueihnak Vuanci, moe Hle-etsit moe Suan-ing Vuanci tloek ni. Ace a bi hlue pupphli ce ikoe mueihna num ak tungnak hue ti ce:

1.Rhamchang Vuanci: veve rhamchang thlangkhi moe voemtoei rhunak a hamna moe tlompal rhunak a hamna ak tungna ang caanak ni. 

2. Presidend Yung Vuanci: ve toe President ak choeina kak awm hlue a tinak a soepnak a hamna moe President ce a ngahna a long a lam a xuinak a hamna ni.

3. Cueihnak Vuanci: veve ni hulam oeh cacongkhi cueihnak a kong oeh soesat hue u ti unoeh thong anik thlak a dawngoeh cueihnak lam chotnak tha a hamna a bi hlue ni.

4. Hleetsit moe Suan-ing Vuanci: Veve Myanmar khui oeh ak ngah soeih Hleetsit (Maa) ce ak laekna poh hamna ang caanakna awmnoeh ni hulam oeh Myintsung ce Taluk eng poh vang a tiikhi ce anih eng a ve a bina a tlak oehtoe a long a lam khawyah awm hlue hue tinak eng a bi hluena awm hue. Myanmar ukkungkhi eng Suan-ing ce Taluk rhamna ani yoih kang a dawngoeh a vekkhi boeih ve ak tungna amoeh eng a bina awm hue. 

Dairamtlang News

Jesuh eng ceoikhuina awithang qoel noeh aw/ thih khoen oeh awithang laek ning ya hlue thlah tha huvoei aw?(1Piter 3:19-20).

********************************************************************************************************

    Thlangxing a hamna kutoet thihna awmnoeh a cecoeng oehtoe awiceknakna awm hlue hue. Hebru 9:27. Thih khoen oeh thlangxing eng amnik cangna hlue tha hue. 1 Piter 3: 19 - 20 khui oehkoe awi ve M'dekkhan thlang xing ak thi-khi a hamna awi thang ( Gospel or Good news about salvation) ak qoel amni hue. Khanthlangkhi ( fallen angels) tinak ni.

    Khanthlangkhi( Satan/ Fallen angel) ve khanna koe eng ani tlak lonak Jesuh eng maichawi a mueihna ti hue. Luka 18:10.Khanthlangkhi ( angels) Khawsa awi koeng ngai unoeh thawlh ak pohkhi ce Khawsa eng thong( prison) khuina ni ta-khi hue ( 2 Piter 2:4 , Jut 6) awicek a ham na. English Baibul ni teok oehtoe “cast them down to hell” or "Darkness" ti khina Khanthlang ak thawlhkhi ani taaknak a huen ni hu tha hue. “cast them down to hell” tive Greek awi na toe “ταρταρόω ” tingahnak toe “to cast down to Tartarus”. Greek awi lung Tartarus tingahnak toe ' Hell' maa am xong hlai hlai( burning fire) tinak amni hue , Tartarus tingahnak toe thongkhui ( prison or prison of darkness) tingahnak ni. A ce a huen nace Khanthlang ( angelic) khawzah awicek a hamna ni takkhi hue. Ace a huen ce Paradai( Paradise) am ni. Hoen a huen na num a awm hue tice u eng awm amsim hue.

    Ace a dawng oeh Jesuh eng Khanthlang thawlhkhi venna Khawsa awi thongnak (Salvation / Gosple) amqoel noeh aning nikkhi ani noengnakkhi akong "awithang" ak qoelna awm hue. Mdekkhan thlang ce ni Jesuh eng  Banlamtung (Cross) oeh a thih doena ni thongkhi noeh,ace ani thongnakkhi eng, rhai ( Satan) a noengnak a kong ce thawng ak tla (prison) khanthlangkhi venna qoel hue.(Jesus’ preaching, then, would not be a preaching of the gospel for salvation but rather a proclamation of victory).Hell khuina awithang laek ak qoel amni noeh, ani noengnakkhi a konglam anim mthehkhi na awm hue.

Myanmar President ak Thai U Htin Kyaw Eng Vuanci Huen 10 Tlaksak Hue

*************************************************************

President Thein Sein eng a uk hui oeh Vuanci 36 anak awm khui oeh Vuanci ngoihnak 10 ce khongnoeh ak chang Vuanci 12 ce Vuanci 6 huenna chot hue. Ave NLD acoyah ak thai eng ani poh hlue ce tuhngoi March 17 oeh President U Htin Kyaw eng Pyithongsuh Hluttaw oeh ak qoel a mueihna ang dang lona awm hue.

ဖ်က္သိမ္းခဲ့သည့္ ၀န္ၾကီးဌာနမ်ားမွာ သမ၀ါယမ၀န္ၾကီးဌာန၊ သတၱဳတြင္း ၀န္ၾကီးဌာန၊ ရထားပို႔ေဆာင္ေရး၀န္ၾကီးဌာန၊ အားကစား၀န္ၾကီးဌာန၊ သိပၸံႏွင့္နည္းပညာ၀န္ၾကီးဌာနႏွင့္ သမၼတရံုး၀န္ၾကီးဌာန ငါးခုတို႔ ျဖစ္ပါသည္။

ေပါင္းစည္းမည့္ ၀န္ၾကီးဌာနမ်ားမွာ သာသနာေရး၀န္ၾကီးဌာနကို ယဥ္ေက်းမႈ၀န္ၾကီးဌာနျဖင့္ လည္းေကာင္း၊ ဆက္သြယ္ေရးႏွင့္ သတင္း အခ်က္အလက္နည္းပညာ၀န္ၾကီးဌာနကို ပို႔ေဆာင္ေရး၀န္ၾကီးဌာနျဖင့္ လည္းေကာင္း၊ လွ်ပ္စစ္စြမ္းအား၀န္ၾကီးဌာနကို စြမ္းအင္၀န္ၾကီးဌာနျဖင့္ လည္းေကာင္း၊ ဘ႑ာေရးႏွင့္ အခြန္၀န္ၾကီးဌာနကို အမ်ိဳးသားစီမံကိန္းႏွင့္ စီးပြားေရး၀န္ၾကီးဌာနျဖင့္ လည္းေကာင္း၊ အလုပ္သမား၊ အလုပ္အကိုင္ႏွင့္ လူမႈဖူလံုေရး ၀န္ၾကီးဌာနကို လူ၀င္မႈၾကီးၾကပ္ေရးႏွင့္ ျပည္သူ႔အင္အား ၀န္ၾကီးဌာနျဖင့္ လည္းေကာင္း၊ လယ္ယာစိုက္ပ်ိဳးေရးႏွင့္ ဆည္ေျမာင္း ၀န္ၾကီးဌာနကို ေမြးျမဴေရး၊ ေရလုပ္ငန္းႏွင့္ ေက်းလက္ေဒသ ဖြံ႕ျဖိဳးေရး ၀န္ၾကီးဌာနျဖင့္ လည္းေကာင္း ႏွစ္ခုေပါင္း တစ္ခုအေနျဖင့္ ထားရွိမည္ျဖစ္သည္။

အသစ္အေနျဖင့္ သီးျခားေပၚထြက္လာမည့္ ၀န္ၾကီးဌာနမွာ တိုင္းရင္းသားေရးရာ ၀န္ၾကီးဌာန ျဖစ္ျပီး ယခင္သမၼရံုး၀န္ၾကီးဌာန ေျခာက္ခုကို ၀န္ၾကီးဌာနတစ္ခု အေနျဖင့္ ဖြဲ႕စည္းမည္ျဖစ္ပါသည္။

Ref:Eleven Media Group

                                                     Dairamtlang News 

• 

Myanmar President(2) Pa Henry Van Thio

**********************************

Pa Henry Van Thio ce NLD party eng Myanmar rham ukkung a hamna tuehna awm hue. Cenamoe Bukda Baeknak 80% a awmnak Myanmar rham oeh Khrihca eng anik uk hluekhi num ti unoeh tuhngoi March 17, corcahnak (Tapeih hmok) dangsak hamna Phungqikhi eng tuen hue u. 

Ace moe turhu noeh Myanmar University Christian Work (Myanmar SCM) eng ve mueihna mcoeinak ta hue u. 

Rhaithakbaok Moe Rhaithakthiim 

**************************

Septakung eng Dai thlangkhi a hamna tlang sang mat ani paekkhi Licang Tlangna khyum ak khyakhi moe rhamsa a hoei eng a baenak tlang matna awm hue. 

Licang Tlangna khawcui khawxai Paipai pai noeh Septakung a Boimangnak dangsak hue. Ace Paipai boeih ang lak oeh Rhaithak pai eng ve mhueihtehnak ak laek soeih dangsak hue. Rhaithak ve ak thiimna ak pai a awm a mueihna ak baokna ak pai awm ba hue. Ak thiim ve Chikca khui oeh pai noeh ak baok ve toe Chikca moe khawxai ang rhiinak oeh cutnoeh pai hue. Ace mueihna a painak eng ikoe num mhueihtehnak ani paekkhi ti ve ti teng lah ve u. 

Rhaithak a thiimna ak pai toe Khawsa hai oeh thlangthawlhna ni awmnak husakna noeh Rhaithak a baokna ak pai toe Khrih Jesuh a thi ak cam eng thlangbaok, thlangdueng, moe thlangloeihna ni awmnak ce huhsakna hue. Ikoe tinoehnum ni ti oehtoe Rhaithakbaok a painak ve Jesuh a thihnak, ni hamna ani thongnakkhi moe ni thawlh anim cim peesaknakkhi a tuem March, April hla oeh ni a pai hue. 

Ace a dawngoeh ni Dai kho oehkoe Rhaithak pai eng ve huhsaknak ang xoi soeih ni peekhi hue. Jesuh eng ni thawlhnak oehkoe eng cimnak ani huhsaknakkhi awithang laek huhsakna huvoei tinoeh poek hue nueng. 

  Rhaithakbaok (White Rhododendron)

Rhaithakthiim (Red Rhododend    

Rhaithak 

Licang Tlang: Dairamtlang

Tlikkuyui: Tlikyui A Konglam

***********************

Tlikyui ve Tlikkuyui awm ana ti law hue u. Cenamoe Dai thlang thlangvang engtoe ikoe mueihna num ani ti huvoei u amsim hue nueng. Kho mat moe mat eng Chuca phaca nik khue ce a bit a bet a loha a dawngoeh. 

Tlikkuyui ve suen oehtoe Mcoei Khona ak cet ni ana ti usoe a tuem tuem oeh ni ang dang lo hue. Ace Tlikkuyui a Lu oeh ni teok soe Muei ce thlang a Lusam a mueih awm hue. Ace ce mcoeina a ceh oehkoe ni ana ti hue u. 

Tlikyui ak khui ve khawyah awm moesoenum mhih am mhang hoh hue nueng, kak cauk khui oehtoe awm hla huvoei soe, amsing cer voel hue nueng. Thlang eng ana tina unoeh, "Tlikkuyui aw thaih teum aw, Sihhon plutna Tui Va La" ana ti lona khoei hue u. 

Tlikkuyui, Tlikyui

Dairamtlang 

Thaa Hin

********

Thaa ve hihvoei hinna mueih hue. Cangma oeh ang hin Thaa awm noeh Khawxai rhukso hui oeh ang hin Thaa awm hue. Ace Thaa khui oeh Rhukso hui oeh ang hin thaa ve ak tungna thlang eng ana aa hue. Cangma oehkoe ang hin toe a bit a betkhina awm noeh Chu ak Pha eng aa soe thlang eng am-aa lok hue. 

Thaa ve ni Dai thlang eng thingthah rhompu ang lak oeh anina ngaih-u matna ana awm law hue. 

Khawngva Pai Oeh Boe Ani Jaeng U, moe Tawnghakhi Puei Ani Tlak U

*********************************************************

Ni Dai baena ikoe mueihna num thlang vang eng ni ti hue amsim boeih hue nueng. Cenamoe thlangvang kanih tung engtoe KHAWNGVA PA ti hue u nueng. Veve Chuca Phacaakhi eng ani aok oehtoe Boe ang lak oeh ni jaeng hue, ang lak oeh Piyai eng Phacaakhi ce nina yai law hue.

Ang lak oehtoe Keeng cun pe ba usoe Pha ace Keeng oeh aok hue. Nasen oehtoe ave Khawngva Pai ve a tui taui soeih soe ngoilam khawpeok lo oehtoe ace khawngva kungna ni Nasenkhi ani pop kang hue u. 

Ave Khawngva thing awm ni seh, Puei ak thlaakhi eng ana holona khoei hue u. Ak chang a thing nak oeh Khawngva thing am mlang ce Tawngha dueih khui oeh  thlang nat noinak ak song a awm oeh Puei tlaknakna ana holona hue u.

Suen oehkoe eng Nupakhi engtoe ni Dai kho oeh Keeng, Khawthah, Thaang, moe Boe ce Chuca, Phaca moe Khyin khyum mtunakna ana holona hue u.

 Khawngva Pa Beo moe Kaeng Ani Cun U

Dairamtlang:Khawngva Pai

Yusuk Soei Rhoh Ve Hoena Koe Eng Num A Lo

**************************************

Suen oehkoe eng Dai thlang eng Yu (Poei) nina Su law hue. Acoeh toe ace Yusuknak ve hoena koe eng ak thoeng lo aw, ikoe mueihna ani tuen lo huvoei aw?

Yusuk ve suen  Khawlek oehkoe eng ana tuen law hoh hue u. Yusuk ve thlang chang Batu, Zotung, Miram, Hakha, Falam moe Muem (Thlo) a poh ni huh a dawngoeh amni hue. Yusuk ve Dai thlang eng a awmnak huen oehkoe eng a nang tuei lo puei matna awm hue. 

Ace mueihna Yu anina suknak ve Pantui Yongca eng a tuen ni ana ti hue u. Ace Yongca pa mat laungna cetnoeh Xam mat eng tuikhuina nulutnoeh Ngabaok mat mtu law hue. Ace Ngabaok ce Xam uem chim uem chim hue. Ace mueihna a uem doeng amkhoek soe laung cengna ceh noeh rhui eng Ngabaok ce thing oeh paa noeh laam hue ana ti hue u. Ace mueihna a laam ak huu Yongca pa eng ikoe mueihna num Xam eng ace Ngabaok am mtu ce a uem chim hue ti ce poek hue.

Ace Yongca pa ce Xam eng Ngabaok a laam ak huu eng ak kawpoek oeh poek oem hue. Acoeh toe a caang donoeh, caang jael noeh a phuih lo coeng oehtoe kho chikca law soe Soei a taak anuk poek oeh Xam pa eng Ngabaok am mtu ce poek noeh a jelnak ang dangsak ak peetakung am mkueihcah ce a huh oeh thlangxing eng ve Soei, Ui, Ai, Vawk moe Khyin khyumkhi ve Septakung Khawsa ani paekkhi ni, cenamoe thlangxing eng ve Septakung amsim hue ti noeh ace ak chikca oeh ce Yusuk tuenna awm hue. 

Ace mueihna Yusu noeh thing paong poh noeh Soei ce anak paa hue. A huuna toe Yongcakhi eng thing paong oeh Soei paa noeh Yusu law oemnoeh Lung ce paongna poh noeh Yusu ana su law hue u. Ace mueihna Lung paong poh unoeh Yu ani suk a dawngoeh Yongca thlang a thih hlue oehtoe aning muemhla ce Paongnga tinoeh mqang hue ti hue u. Ace ce tuh doena ak thuem a mueihna awm hue. 

A coeh koe eng ni cut unoeh Tunu, Thangpa, Peong ak Beoi moe Tengtoeng bangrho ani holonak hue u ana ti hue u. 

Kut oet oehtoe Pengsawng (Kheng) pa mat Yusu lawnoeh tam lawnoeh ve mueihna ti hue: “Khuih ka pengsawngca, ka kah a caa ni nani kah u, ka rhoh a caa ni nani rhoh u, khuih ka pengsawngca kai eng rhoo law nueng soe ni nani rhoh u,kai eng kap law nueng soe ni nani kah u,-ka caa eng rhoo ba kom kamoeh eng rhoo ba kong” tinoeh tam hue ti hue u. A kaeng oeh ak awm animoeh Pengsawngpa mat engtoe ak kaw amtla law soe “ka puei aw,ngoi hlah ningnih ve haiche ni la heu kom,thlang eng ning ya law kom,Suen a yan oehkoe eng cut noeh ni hicim phung oeh -cee cena Petkho na Pantui Yongca va ana rhoo ana kap law maa soe, a ningnikkhi eng va ka rhoh a caa ni nani rho u,ka kah a caa ni nani kah u ani ti u, nang moe kaa ce tuh ni ,ni kah lo, tuh ni ni rhoh lo” ti pe soe ngoinoeh tuichik oeh nik chum a mueihna awm hue ana ti hue u.

 Soei Xa Paa noeh Yu ak Su

Yusuk oehkoe Paong( Thing paong)

Dairamtlang News

November 8, Tuehnak

**************************

Kawl kho democracy huhnak a hamna thlang boeih eng aning ngaih-u u tuehnak ce ya noeh poengna awm hoh hue. Ace tuehnak mee khui oeh NLD eng a noengnak kuu noeh USDP ve rhalkap a awmnak huen doeng oeh ni noengnak a huh hue.

Mee ak do soeih toe Kawlin mlueh (Kawlin Myo) oeh ve NLD =4000 moe USDP =0 eng noeng hue. Ak changkhi oeh awm NLD eng a noengnak daa noeh USDP oehkoe a xamkhi ak tlaa amva hue.

Ace mueih lorna nimoeh Chin rham khui oeh Hakha, Batu, Paletwa moe Falam oehtoe NLD eng Hlawtdaw a cuu (pyituh hlawtdaw, Pyine hlawtdaw moe Amyota hlawtdaw) boeih noeng hue tinoeh 7Day News Journal eng qoel hue. Awithang ak laek soeih toe nimoeh Dai thlang Saya Hon Kheng ve NLD oeh Pyine Hlawtdaw ce Batu tung oehkoe eng cuh noeh noeng. Uem ham soeih soeihna awm hue.

November 8, Tuehnak

**************************

Kawl kho democracy huhnak a hamna thlang boeih eng aning ngaih-u u tuehnak ce ya noeh poengna awm hoh hue. Ace tuehnak mee khui oeh NLD eng a noengnak kuu noeh USDP ve rhalkap a awmnak huen doeng oeh ni noengnak a huh hue.

Mee ak do soeih toe Kawlin mlueh (Kawlin Myo) oeh ve NLD =4000 moe USDP =0 eng noeng hue. Ak changkhi oeh awm NLD eng a noengnak daa noeh USDP oehkoe a xamkhi ak tlaa amva hue.

Ace mueih lorna nimoeh Chin rham khui oeh Hakha, Batu, Paletwa moe Falam oehtoe NLD eng Hlawtdaw a cuu (pyituh hlawtdaw, Pyine hlawtdaw moe Amyota hlawtdaw) boeih noeng hue tinoeh 7Day News Journal eng qoel hue. Awithang ak laek soeih toe nimoeh Dai thlang Saya Hon Kheng ve NLD oeh Pyine Hlawtdaw ce Batu tung oehkoe eng cuh noeh noeng. Uem ham soeih soeihna awm hue.

Ca Cong Im (Boidah Im= Bawda Sawng)

**********************************************

Mva awina Bawda Sawng ti ve Dai thlang eng nik awina Boidah im nina ti hue u. Ace ce nik awi takna toe Ca Cong im ti hlue ni. A ve mueih ca cong im ve Batu oeh moe Mahtu oeh ce ana awm law hue. Batu oehtoe tuh toe amom voel moesoenum Mahtu natoe tuhdoena awm huen hue.

Ak khyuem oehtoe Batu na Dai thlang, Zotung thlang, Miram thlang, Lautu thlang, Thaiphum thlang, Cing thlang moe Doem( Tuithim) thlang tung boeih ve Batu oeh sengim kai u noeh ca cong omnak im ce sa rhip rhip hue u. Tuh oeh phungqi im a haihmah lo Ngala kho tung, Sengim a hakdang oeh ce ave mueihna im sa hue u.

Ca cong im oeh awm ve thlang vang engtoe amsim moesoenum ak sim a hamna toe ikoe mueih tlukna num a kueinak moe a do a saernak a om tive ni sim tha hue. Ca cong imna om ve a naomnak a om a mueihna a kueinak awm khawyah om hue. Caang boeih soe caang ni phui noeh Mahtu ca cong im ka pha hlah hlah ka ngah moe sengim kaih, toi a aan suikhi ka poek oeh amkam mhih thana awm hue.Ace ca cong imna buh aok aan aa khi awm ni seh ni khona ni aok ni aa moe ammueih hue. Ak lawhana ang aop moe a tui a hlimkhi ka poek oeh Mahtu ca cong im ve ngai hue nueng. Ace doeng amkhoek noeh Sengim kai hah puei a pookhi moe matna cehcon ngoihngamnak, awm-ihnakkhi ka poek oeh awmdam ham om soeih hue.

Songhekbok

***************

Songhekbok si lam oeh ak simkhi engtoe natnak 40 rhoeisak hue ti hue u. Ak kaa oeh Mva awina ani yawk u ce noer lor lah ak cerna. Ace mueihna a awm oeh laek num ni Dai thlang suen oehkoe eng cemueih tlukna nat a noi amma ni soongnak ve ti hue nueng.

Kamoeh eng kana poeknak oehtoe songhekbok cu longna vai khong noeh Ngakcak oeh ci sangpho moe ni sum soe ang aop hlue doeng ni kana poek hue. Natnak 40 a noengkhi toe amna poek khoei hue nueng. Ikoe mueihna awm soeyon Songhekbok ve cu ngakcak oeh ni sum oehtoe ang aopna yom aop noeh natnak awm a rhoeisak hlue bana a tlak oehtoe phumah soeih hue ti noeh poek hue nueng. Ni Dai thlang eng hailam doena aa hamna koeh nim mhih ve u. Ammak sim awm nim mtheh rhu poetoeng u seh ti noeh ning yaksakkhi nueng.

Songhekbok

***************

Songhekbok si lam oeh ak simkhi engtoe natnak 40 rhoeisak hue ti hue u. Ak kaa oeh Mva awina ani yawk u ce noer lor lah ak cerna. Ace mueihna a awm oeh laek num ni Dai thlang suen oehkoe eng cemueih tlukna nat a noi amma ni soongnak ve ti hue nueng.

Kamoeh eng kana poeknak oehtoe songhekbok cu longna vai khong noeh Ngakcak oeh ci sangpho moe ni sum soe ang aop hlue doeng ni kana poek hue. Natnak 40 a noengkhi toe amna poek khoei hue nueng. Ikoe mueihna awm soeyon Songhekbok ve cu ngakcak oeh ni sum oehtoe ang aopna yom aop noeh natnak awm a rhoeisak hlue bana a tlak oehtoe phumah soeih hue ti noeh poek hue nueng. Ni Dai thlang eng hailam doena aa hamna koeh nim mhih ve u. Ammak sim awm nim mtheh rhu poetoeng u seh ti noeh ning yaksakkhi nueng.

Songhekbok

****************

Songhekbok si lam oeh ak simkhi engtoe natnak 40 rhoeisak hue ti hue u. Ak kaa oeh Mva awina ani yawk u ce noer lor lah ak cerna. Ace mueihna a awm oeh laek num ni Dai thlang suen oehkoe eng cemueih tlukna nat a noi amma ni soongnak ve ti hue nueng.

Kamoeh eng kana poeknak oehtoe songhekbok cu longna vai khong noeh Ngakcak oeh ci sangpho moe ni sum soe ang aop hlue doeng ni kana poek hue. Natnak 40 a noengkhi toe amna poek khoei hue nueng. Ikoe mueihna awm soeyon Songhekbok ve cu ngakcak oeh ni sum oehtoe ang aopna yom aop noeh natnak awm a rhoeisak hlue bana a tlak oehtoe phumah soeih hue ti noeh poek hue nueng. Ni Dai thlang eng hailam doena aa hamna koeh nim mhih ve u. Ammak sim awm nim mtheh rhu poetoeng u seh ti noeh ning yaksakkhi nueng.

Thlang Songkit Yu Bumnak ( Mass Wedding)

**************************************************

Thlang songkit yu bumnak ak khyuem oehkoe hoh hla ni, ni Dai thlang ammak hu ammang ya khoei a hamna kak chan lo ni. Thlang songkit yu bumnak ve Sun Myung Moon or Unification baeknak hona hue. 1997 oeh Amerika rham Washington oehtoe Chungva khoep 30,000 eng chungvanak ta hue u. 2013 oeh Korea na yawm thlang 3,500 eng yu bumnak ta hue u.

Ace mueihna Unification Baeknak eng ve thlang 50, 100, 300, 500 khi toe kum tue kuem oeh chungvanak poh pe oem hue. Kawpoek kuei hue hoena koe thlang ce yah yah anih engtoe ak chungva sak huvoei aw? Thlangkhi a Baek-im oehtoe kum oet oeh mat Chungvanak ak poh hlue thlang pateng amom hue. Hoenak awmkhi huvoei aw?

A ningnikkhi ve congpuei thawlh ( Cults) ani ti a poena awm hue u. Khawsa awi ve a lukcing lengthakhina ak cehpuei ak thlangkhina awm hue u.

First World, Second World, Third World

********************************************

Mdek ak cueknak (First World), Mdek ang hihnak(Second World), moe Mdek am thumnak (Third World) ti ve, ni Dai thlang ammak sim eng ni sim cueinak a hamna kak chan lo ni. Thlang vang ni Dai thlang Amerika, British or London, Canada moe Australia khi ve mdek am thumnak ni, nina ti koe koe hue. Ace -First World, Second World, Third World khi ve ak kai oeh ni teng lah ve u.

First World

"First World" ti noeh a nik khue ngahnak toe khawrham a laeknak, Set eng bi binak rham, rham a donakkhi ce mdekkhan Ceemnu ang hihnak (World War II ) oeh koe eng anik khuena awm hue. Amerika( Japan, South Korea), North Amerika ( Canada) , Western Europe (Norway, Swenden, Netherlands, Belgium, Iceland), Australia, New Zealand, South Afrika moe Singapore rhamkhi ve First World ( Rham Cueknak) ti hue u.

Second World

"Second World" ti toe Communist socialist rhamkhi, Set eng bi binak rhamkhi ce ak tungna ti ngahna hue. Khawpeok tung rhamkhi( Eastern Bloc) moe Union of Soviet Socialists Republic (Russia, Eastern Europe (e.g., Poland), Turk States a kaengsam (e.g., Kazakhstan) moe Taluk (China) rhamkhi ce Mdek ang hihnak ( Second World) ti hue u.

Mdek ang hihnak rhamkhi (Second World Country)

Albania----------Southern Europe
Armenia---------Western Asia
Azerbaijan------Western Asia
Belarus----------Eastern Europe
Bosnia moe Herzegovina-----Southern Europe
Bulgaria----------Eastern Europe
Croatia-----------Southern Europe
Czech Republic----Eastern Europe
Estonia----------Northern Europe
Georgia---------Western Asia
East Germany-Western Europe
Hungary---------Eastern Europe
Kazakhstan-----South-Central Asia
Kyrgyzstan------South-Central Asia
Latvia-------------Northern Europe
Lithuania---------Northern Europe
Macedonia-------Southern Europe
Moldova----------Eastern Europe
Montenegro------Yugoslavia
Poland-------------Eastern Europe
Romania----------Eastern Europe
Russia-------------Northern Europe/Asia
Serbia-------------Southern Europe
Slovakia----------Eastern Europe
Slovenia----------Southern Europe
Tajikistan --------South-Central Asia
Turkmenistan---South-Central Asia
Ukraine-----------Eastern Europe
Uzbekistan------South-Central Asia.Vekkhi boeih ve Second World ti hue u.

Third World

"Third World" ve ak sii am rha rham moe rham khuikha khi boeih ce First moe Second World oeh ammak awm rhamkhi Afrika, Asia, moe Latin Amerika tloek ni. Third World rham ti toe sumthaem (Economics) lam oeh rham chang thaem tloek ak kuna ak hona, ca sim a yoinak, thlang a khawdengnak, rham khuikhakhi ce ni.
Third World rham oeh ve Venezuela, North Korea, Mali, Saudi Arabia moe Myanmar rhamkhi thum kang hue.

Nobel Prizes ak Doem Soeih ak Hu Judah thlangkhi

************************************************************

Khawmdek khan oeh "Nobel Prize" ve kutdo thaem khui oeh a phu kuei soeih matna awm hue. Ace Nobel Prize ve Sweden moe Norway thlangkhi eng 1895 oeh cut u noeh kutdonak ana pe law hue u. Ace kutdonak ce Sweden awina "Nobelpriset" ti u noeh ; Norway awina "Nobelprisen" ana ti law hue u. Ace ce Thlangbok(English moe Amerika) eng toe "Nobel Prize" ti usoe tuh doena thlang boeih eng ani simna awm hue. Ace Nobel Prize ce 1901 kum oehkoe cet cut noeh mdekkhan pum eng kutdo thaem paek ak sang soeihna anak pawm lo puei hue.

1901 oehkoe eng cut u noeh Physics, Chemistry, Physiology or Medicine, Literature, moe Peace kutdo ce ana pe law hue u. Economics lam tung kutdonak awm 1969 oehkoe eng ana pe law hue u.

Nobel Prizes ve thlang 850 ani kutdo khui oeh 170 (20%) toe Judah thlangkhi eng ana hu law hue u. Cenamoe Judah thlangkhi ve 0.2% doeng ni ani lo hue u, mdekkhan pum thlangmi moe nim mhueihteh oehtoe. Judahkhi ve anik thlangmi yoi soeih hla hue Nobel Prizes kutdonak oehtoe mdekkhan pum oeh ak doem soeihna awm hue u. Ak huukhi ve a culumna 41% Economics(Sumthaem suinak kutdo),
28% Medicine(Sii lam kutdo),
26% Physics(Ang rhing ang ko, ak hlok ak ling ti mueih thaemkhi),
19% Chemistry (thaem mat moe mat mcun soe ang coeng lonak suithanak),
13% Literature (Ca tung oeh ak sim, ca a long a lam ak thoep tha) moe
9% Peace awards (Rhoepnak kutdo 9%) eng hu hue u.

Avekkhi ni huh oeh Khawsa thlang tueh Judah thlangkhi ve yawkdonak tuh doena hu hue u. Thlang khawyah eng Mdekkhan mang soeih Bill Gate awm Judah thlang ni ti hue u. Ace doeng amkhoek noeh Amerika na yom Judah thlang ve thaem suinak lam oeh ak thamah soeih ni ti hue u. Avekkhi ni poek oeh Khawsa thlang tueh ve mdekkhan yawkdonak awm hu hue u.

Myanmar President Tueh Coeng Oeh Ak Awmhluekhi

*******************************************

Yanoeh Myanmar ukkung hamna President tueh coengna awm soe, Singapore rhamna awmkhi Myanmar thlangkhi toe ani awmhlue aih uet oeh ak pungna peong ak beoi eng oeh laam hue u.

Ace doeng amni noeh Yangon huen khawyah oehtoe ani awmhluenak dangsaknakna aok a aakhi poh unoeh ak cet conkhi mcah hue u. Yangon, Mayaingon mlueh oehtoe awmhluenak dangsaknak Poster khawyah tai hue u. 

Myanmar President U Htin Kyaw Mee 360 eng Noengnak Hu Hue

*****************************************************

Myanmar rham uknak a laeknak a hamna thlang khawyah eng a ngah anik tueh u U Htin Kyaw ce Mee 360 hunoeh April hla oehkoe eng Myanmar rham uk hamna awm hoh hue.

Cho, Thlo Ti Ve Ukhi aw?

*****************************

Ni Chin rham khui oeh khawsak rhamsaknak a do lo a mueihna thlang boeih eng ak thlang phun lungna noeh a tui a kho, ang tueinak moe am laung ak kaong ce hul law hue. Ace mueih lorna Dai thlang, Cho/ Thlo/ K'cho ( Muen) thlang, Mkaang thlang moe thlang phun changkhi boeih eng awm ani thlang phun ce hul law hue u.

Tuh oeh ve Group khui oeh  ak awm khui oeh huhnak yaknak ammang mueihkhi thlang khawyah ni. Ace a dawngoeh thlang chang ak khuui ak khing amna sim oehtoe awi a yap yapna koeh ti kom uk te. Mrhennak eng ka ning yaksakkhi ka ngahna awm hue.

Dai thlang ve Batu mlueh tung, Mindat Mlueh tung, Kanpalet mlueh tung moe Paletwa mlueh tungna ni awm hue. Ace khui oeh Batu mlueh tung moe Paletwa mlueh tungna ak awm Dai thlang engtoe "thlo or K'Cho" ti ve Muen thlangkhi ni ka ni ti khoei hue u. Ace mueihna awm soe Thlo or K'cho ni ti u noeh, kheunak, ca yawknak koehna ni taaknak a hamna ni ngahnakkhi nueng.

Kanih tung Dai thlang engtoe "K'cho" tive "Thlo" ti u nueng. Chin ti hlue ang yueng oeh ve " Lai or Laitlang" ti u nueng. Suen oehkoe eng tuhdoena "Thlo or K'cho" ti ve amka ni honak a mueihna, kani ti oeh ce Mindat tung nak awm "Muen" thlangkhi ce "Thlo" ti u noeh anak khue law u nueng. Ace a dawngoeh K'cho or Thlo ti ve Muen thlangkhi ni. Thlo or K'cho ti noeh koehna nik khuenak a hamna ni ngahnakkhi hue nueng. Cenamoe K'cho or Thlo ve Chin rham or Lai ram pum kuenakna a awm oehtoe ave Lai ram oeh kani awm lor a dawngoeh hatlakna hlue hue nueng. Batu, Mindat, Kanpalet moe Paletwa doengca Thlo or K'cho ti ve ammang coeng tha hlue kawih ni ti hue nueng. Ikoe mueihna awm soeyom "Thlo" ti ve Lai tlang pum tinakna amma nii oehtoe koeh ni thuum losak u ti noeh mrhennak thoeh law hue nueng.

Uem Soeih Soeih Hue Nueng,

ဒုိင္=Dai= (a=/ə/), ဒုိင္ရ္ = Dair = IPA(key): [d̪ˠaɾʲ;), ဒါအိုင္=Daai =/aa=(/ɑ:/) !!!!?

Dai thlang!!!!!

*******************************************************************************************************************************

Ikoe mueihna "ဒုိင္ရ္ = Dair, ဒါအိုင္=Daai" tinoeh a ni yawk huvoeinum ti ce ka poek oeh khawmdek khan oeh kawpoekkuei matna ngai hue nueng.

Khawmdek khan oeh cueihnak sang noeh, thlangkhi a hoei poh unoeh, khan nakoe Pihla khanna pateng kai unoeh, ni awmnak Mdeknu ve a lucing lengthana pohvang ani ti huioeh, ningnih Dai thlang eng ve "Dai" ti awilung mat caya tuhdoena amni yawk tha ve kawsaet awmsoeih hue.

Haidangnak( Facebook) khuioeh ni haih teok soe "dai, Dai, Daai, ဒုိင္,ဒုိင္ရ္" tinoeh ani yawkkhi ve amnik sim a hamna toe lucing havenna ani taakhina awm hue. Ace a dawngoeh thlang boeih eng ikoe mueihnanum ni Dai thlang angming ve ni yawk hlue tice ni sim hamna ngahsoeih hoh hue.Akka oeh a betca ni teng lah ve u;

i). dai= Ni Dai thlangphun ang ming ni yawk oeh ve calung ang xoina "Dai" tinoeh ni yawk hamna awm hue. Calung ak joi eng "dai" tinoeh na yawk oehtoe " rhodai, daikho" timueih na awm hlue hue. Ace a dawngoeh thlangphun ang ming na yawk hlue oehtoe " Dai" tinoeh yawk kop te.

ii). Dai=Dai=/ə/ moe Daai=/ɑ awilung mat eng ni Dai thlangkhi kawvintumna ni taakkhi hue. Thlangkhi eng ISO 639-3: dao oeh "Daai" tinoeh ani yawk u ve, ningnikkhi Dai thlang eng ikoe mueihnanum awilohhawi ( pronunciation) ni taak tive amma ni sim a dawngoeh ni. A konglam ak yawk hlue eng ve ak cerna a thoep kaana a yawk a dawngoeh tuh oehkoe ni Dai thlang eng dawi tloh vik u soe ni. A tak natoe "aa" pakhih anglak oeh "a" mat moe Dai tinoeh ce awiloh ni ta hue.

Nik awiloh a cehhawi oeh Daai "aa" ( long vowel or double vowel) amni noeh,nimoeh Dai thlang eng nik awiloh tak nace "a" mat ( Single vowel) Dai awiloh nace ni hona hue. Thlangkhi eng i yahna poh soeyawm nimoeh nik Dai thlangna eng ikoe mueihnanum kang mingnak hue tice ning simrhu hamna ngah hue.Kawl ( Mva) moe thlang changkhi eng ni Dai thlang ang ming a yawk ve ak thuem ni koeh ni ti ve u. Mvakhi moe thlang changkhi eng Dai thlang ang ming ce amma ni yawk tha a dawngoeh Xung Ka ce Hung Ka, Thang Xung ce Thang Hung, Kuei Yawm ce Kui Yawm, Bueng Ma ce Bung Ma, tinoeh ani yawk ve ak thuemni amni ti tha hue. Hmueihtehnak oeh; Cang Ring tive ak thuem amni ,a taak natoe Cang Rhing ni. Loei Thang ce thlangchangkhi eng a ni yawk oehtoe Lawi Thang ti unoeh, Rheng Peok ce Reng Pok, Coei Peok ce Coi Pok, Tui Peok ce Tui Pok , Ngo Peok ce Ngo Pok tinoeh a ni yawkkhi ve ak thuem ni tinoeh amnik pawm puei tha hue.

Thlang changkhi eng kang ming ve; Cang Ling, Cang Rin, Cang Reng, Kang Ring, Keng Ring, Kaang Ring, Chang Ling,... ti unoeh khawyahna nik khue hue u. Anik khuekhi boeih ve ak thuem mat awm amhu hue nueng. Ak thuem soeih toe, Ka Nupa( My Parents) eng kang ming a ni sui amueihna anik khue ve ak thuem soeih ni. Ace mueih lorna, ni Dai ang ming awm, thlangkhi eng iyah nayawm tiseh , ning ming ce nimoeh eng ni awilohhawi amueihna ak cerna ni sim hamna ngah hue.

Thlangchang eng i yahna yawm ana yawk noeh Daaai , Daai, Dhai, Djai awm ana ti yap seh, ak tuungna toe nimoeh nik Dai na eng ikoe mueihnanum awilohhawi ni cehsak, khawkhli hawi imueihnanum ni loh tive ak tung ni. Thlang changkhi eng ana poh a hoei, ana ti a hoei ak thuemna nik pom boeihna a tlak oehtoe, hoetuek oehnum ni Dai thlang eng ak thuem lam ni pan hlue tha hue. Tingahnak toe nimoeh Dai thlang eng awilohhawi ni taak ve "aa" eng Daai amni noeh "a" eng Dai awiloh nace, nina hona hue.

iii).ဒုိင္= Vetoe Dai moe ang mueih rhoi ni.ဒုိင္=Dai

iv).ဒုိင္ရ္= ဒုိင္ရ္ tive awilohhawi tak natoe "ဒုိင္ရ္= Dair" ti ni. Ikoe mueihna awmsoe "ဒုိင္ရ္= Dair" ti unoeh a ni yawk huvoeinum tive kawpoek kuei soeih matna awm hue.

Ace a dawngoeh "Dai= ဒုိင္=(a=/ə/ ), ဒုိင္ရ္ = Dair = IPA(key): [d̪ˠaɾʲ, Daai =/aa= ɑ:/" khui oeh ve " Dai" ti noeh ni yawk ve nimoeh eng ni awilohhawi taak ni ti ce a bet ning yaksakkhi hue nueng.