Dai Community in Malaysia

Malaysia na ak awmkhi Dai thlangkhi cunboemnak ani poh ce kum xa (10) a kuep hlue hoh a dawngoeh ngoihcunnak (Meeting) ce March 25, 2017 ak pha lo hlue kum oeh ce taakna awm hlue hue.

Ace mueihna kum xa a cupnak ani poh hlue a dawngoeh khochang rhamchangna ak awmkhi Dai thlang boeih eng poeknak lam oeh ni seh, tangka lam tung oeh ni seh nani poh tha khui oeh nani peuinak hamna yaksaknak ta law hue u. Ref: Yawng Yawnghung Thang

Yangon Dai Christmas Poh Hoh Hue U

Tuhngoi December 17, 2016 oeh ce Batu Mlueh tung oehkoe Yangon na ak awmkhi nimoeh Dai thlangkhi eng Merry Christmas ce ak naomna pohna awm hoh hue. Christmas ce Shwe Mya Ya Prayer Mountain, Hmawbi, Yangon oeh ce hona hue u. 

Ace Christmas oeh ce Yangon Mluehnu oeh ak awm nimoeh Dai thlang, thlangmi 100 hla cun tha unoeh Khawmdek khan a lungnak aih uet oeh a Capa a paek ce uem doena omhlue thoeihya eng mkueihcah hue u. 

Yangon Dai thlang eng Christmas ani honak oeh ce Saya Kee Tun eng Khawsa awithang, Capa paekna a awmnak a konglam ce qoenna awm hue. 

Tuh-oeh ani poh Yangon na, Matupi Myone Dai Christmas ve a thumvoeinakna awm hue. Hailam doena ani pohnak qxoer qxoer a hamna Khawsa venna cuekcahnak eng ni sim puei rhip rhip ve u.

Jesuh Khrih A Thangnak Thingpai Rhopaikhi Eng Do Sup Sup Hoh Hue U

Teoklah, ni Boipa Jesuh Khrih a thangnak thingpai rhopaikhi eng awm omhluenak eng do sup sup hoh hue u. Rhompupai, Rhaithakpai, Tlangchuipai, Khawngvapai, Qxemrhupai, Khoituipai, Uiphlutpai,... moe ak chang changkhi eng om do hue u.

Rhompupai 

                                                           Rhaithakpai

Tlangchuipai

Licang Youth Fellowship Association 

Nimoeh tungna kum 1985 tluk oehkoe eng cutnoeh Batu na sengim ak kai boeih eng Licang Youth Fellowship ve ana poh law hoeih hoeih u nueng. Avoeh ve xuikungkhi toe Rev. Ling Ma, U Kuem Nai (thlangthi), Rev.Dr. Quem Hluei moe tlongthoh lam tung oeh xuikung a hamna Saya Koei Ceng ana awm law hue. 

Ace hui oehtoe Tangnga oehkoe eng cutnoeh tangxa doe Batu doeng doengna sengim kaihna a awm a dawngoeh nimoeh Dai thlang a awmnaak cacong-im ce tuh-oeh phungqi im anuk kaa lo oeh ce ang thongna thong pen pen hue. 

Ve mueihlip ve 1987 oehkoe mueihlipna awm hue. Ka omdam oeh ammak hukhi a hamna kak chan lo yap ni. 

Thlang nani sim a awm oehtoe haih ti law lah u boe

2016-17 Cacong Kum Oehkoe Tangxa Camingpoei Ani Phinak Hlue

Khawsa venna cuekcahnak eng ni sim puei rhip rhip ve u, tuhhi toe nik thlangkhi khawyah eng Tangxa camingpoei a ning aungnak a hamna, cuekcahnak eng koeh nim mhihnak hamna ni ngah nakkhi hue nueng.

Dai Thlang A Khawsaknaak 

Dai thlang eng ve mueihna va dueih oeh kho nina saa khoei soe. Dueih mat oeh Nukdoem, Pakdoem, Nutai, Patai, nim mcot nim cang a im awm soe, do a saer oeh awm mat moe mat ning teok ning khen rhunoeh kho ni saa hue. 

Kawngma na maa ni aomnoeh nukdoem, pakdoem, Patai, Nutai, Ka Cii, Ka Naa, Kam Mcot Kam Cang ni tinoeh ninang khue rhu khoei hue. Buh a meh a awm, do a saer moe khin ak khaa a lo oeh awm ning bom ning cen rhu hue. 

Nukdoem Pakdoem a imna meh neeng usoe buh aanoeh, Na patai eng Sakkhi kap law soe Sakkhi sa aa noeh, Na Pakdoem a thaang oeh Vawmnga aok soe ani phuih lookhi ngai lor lah. Dueih (kho) mat oeh thlang mat eng buh a meh hunoeh a sun a kah oehtoe thlang boeih eng animoeh a koe rhoe amueihna ao a aa hah unoeh kho ani sak ka poek oeh Dai thlang a khawsak rhamsak ni ak awmxa soeih hoh hue ti hue nueng.

Tuh toe ngai lor lah!  Ka Nukdoem, Ka Pakdoem, Ka Nutai, Ka Patai, Ka Cii, Ka Naa, Kam Mcot kam cang,... ti ve amni hu tlah, muengtueng mangtangna khawvangvuena ni awmnoeh ikoe kho awm amningngai voen hoh hue. Pacaaxui, pacaphom matna khosaknaak hlue toe amom voen hue oe! 

Ni Dai thlang khawsak rhamsak ni ka poek oeh ak naom soeih, ak awmxa soeih, ak do soeih a mueihna ka poek hue. 

A Capa Tuhhi Tangxa Aungnoeh Siboi Am Mhi Hlue

Ka Capa Siboi (Doctor) am mhi hlue tinoeh Maa taang rhinoeh rheh quet soe, ikoe mueihna ca toe a teok a ii hlue huvoei num amsim hue nueng. Thlangkhi ace mueihna Maa taang rhi unoeh amma ni rheh awm anak aungkhi vamni tunum, hoe mueihna ce mueih papaana cu, ikoe mueihna a teok a ii hlue num?

Allah Eng Kum Thong-oet Doe Uknaak Ni Pe Hlue Hue Ak Ti Gambia Rham President Tuehnaak Sung Hue

Muslim thlang Allah ak uepna Yahya Jammeh eng Gambia rham uk a hamna Allah eng kum thawng-oet ni pe hlue hue tinoeh tuh oehkoe President tuehnaak oeh sung hue. Jammeh ve kum 22 khui oeh Gambia rham anak uk lona awm hue.

Tuh oehkoe tuehnaak oeh ve President Jammeh eng noeng kom tinoeh anina poek lo hla ni, u eng awm amma poek, noeng kom tinoeh amma ni poek Adama Barrow eng  noeng hue. Ace mueihna a noengnaak ve President Jammeh eng awm hatlakna hue.

Barrow ve Londonna Sengim ak kai matna awmnoeh a sengim kaih hui oeh thaemyawihnaak mat oeh security anak bi lona awm hue.

President Jammeh ce vote 36.7% hu soe Barrow eng vote 45.5% hunoeh  noeng hue. Ref: BBC News  

Amerika eng Myanmar Thlang Am Mrhuklu Sui Hui Hue U

Amerika rham Buffalo mlueh oeh Myanmar thlang mat mrhulu noeh ak cen ce Palik eng mtu a hamna sui huina awmnoeh ak huu boeih eng anik qoennak a hamna ni ngah nakkhi hue. 

Kum 32 ak thlang, pe 5' 8" sangnoeh a pum a rhih ce 155 pound lawnoeh ကိုရန္စိုး ani ti u ce Amerika Palikkhi eng sui hui hue u. Ace mueihna a thot puei ve a kum kum 17 ak kaa lamna awm hue. Ref: Burmese.DVB.No

Thlo Paem moe Cimca Ben Mah

Veve thlo paem ana ti hue u. Ikoe tinoeh Thlo Paem anina ti huvoei aw? Ak khyuem oehkoe eng phungrhaai (phunglong rhaai) tungna awmkhi eng ave ve anak bah law khoei hue u. Nimoeh Dai kho oeh ve Suntui Liksoi toe ave mueih amna honaak cer hue u. Cenamoe Xuengphawng, Kheng (Pengsawng) oehkoe eng cutnoeh ni Dai khokhi Loeicaa, Tuili, Msir (Saitu) Duk kho oehkoe eng Muem kho doena ave Thlo paem ve Cimcaa ben mahna anak bah unoeh a kue a saengna a nang ngai hue u. 

Cimcaa ave mueihna mcak eng a taang ce yawp unoeh a meema ani poh ve ikoe naak oeh awm a koe soeihna poek hue u. Ave ve ak cuek oehtoe boi a mangkhi eng ni anik bah ana ti khoei hue u. Cenamoe a huna toe poh koeluep unoeh ak poh tha, ak thlaa tha boeih eng bah rhip thii hue u. 

Thlo ni ti toe Mva awina tuh-oeh Cho ani ti u, Muen thlangkhina awm hue u. Tuh toe animoeh Muen thlangkhi engtoe ningnih eng "thlo" tinoeh nik khue, Mva awina "Cho" ani ti ce "K'cho" ti unoeh yawk hue u. Ak tungna Muen thlangkhi ni. K'Cho/ Cho/ Thlo ti toe Muen awina awmnoeh a tingahnaak toe "tlang", "tlangtung" ti ngahnaak ni. Mindat tung, Kanpalet tung ak awmkhi eng ani honaak ni. Tlang thlang boeih Mizoram, Nagaland, Tripura, Manipur, Chittagong, Assam North doena moe Chin hill a culumna thlii ngahna hue. 

Kho Chikcaa Lawnoeh Oe Omdam Cu Kon Hue

Thlangkhi Happy Merry Christmas/ Happy Sweet December ti unoeh Haicauk (Facebook) khui oeh hlah pok pok usoe hangngai noeh soe ni Dai kho ka nuk poek oeh tlang tungna ning mang soe kho cii rhoeih rhoeih noeh ikoe eng awm amma nim mhlip hluekhi kom a mueihna ning ngai hue. Ace mueihna kho ak cii oehtoe hoetuek kon soeyom duem kho/ khawcui ammak awm hlue kom amueihna, hoetuek kon soeyom khongmaa eng khan ammakdah hlue kon amueihna nina poek hue. 

Ave mueih cikca eng va ammak omdam awm omdamsak noeh ammak kawsae hlue awm huhkhyuem/ kawnghu poeksak tlah noeh omdam sak hue. Pueipo mat moe mat hlah rhudam unoeh, ak cet hlue eng a puei a cehtaak damnak a tuemna awm hue. Nula cadawngrhoi eng khanna aisi keva ani hak teok oeh kho chang changna ak awmrhoi ace Aisi pihla oehtoe ni mik-hai  xum mah voe oe tinih noeh ana omdam khoei hue u ana ti hue u. 

Mcungnu tlangsangkhi, pung a peenkhi ni teok soe dang heu peng peng noeh, kho ak cii rhoeih rhoeih ve omdam phui ni ana ti hue u.