President Ak Choeina awm State Counsellor Aung San Suu Kyi

Aung San Suu Kyi eng NLD ang aung oehtoe President ak choeina kak awm hlue a ti ce sutsak hoh hue. Ikoe tinoeh num ni ti oehtoe Aung San Suu Kyi ce State Counsellor na awm hamna NLD coyah eng ani poeknak ce Amyotha hluttaw eng anik pom pe coengoeh Pyithu Hluttaw pha puei usoe NLD thlang khawyah ani lo a dawngoeh Rhalkap tloek eng amngah unoeh kah loei usoe Pyithu hluttaw eng awm pawm puei bak bak hue. 

NLD eng State Counsellor a poh ngahnak toe Aung San Suu Kyi ve President bi hamna rhalkap tloek eng koeh ngah unoeh anih ak kangna ukpade ani poh a dawngoeh tuh toe president ak choeina awmnak a hamna lam ani sui pena awm hue. Ace State counsellor ce khorham a laeknak a hamna moe Federal rhamna a awmnak a hamna ak ngah soeih matna awm hue. Cenamoe rhalkap engtoe amngah noeh State Counsellor ang yuengna President advisor na ni ta useh ti hue u. 

Ave ani pohnak toe NLD eng 2008 ukpade pohmah 217 a mueihna ani pohna awm hue. President ve a ngah oehtoe thlang mat mat amma ni oeh thlang bawng eng puei tha hue tinoeh awm hue. Ace ce tuh oeh ani lohna awm hue. Ace mueihna ukpade oeh a awm a dawngoeh NLD engtoe Ukpade a mueihna pomna awm hlue hoh hue. Amyotha hluttaw moe Pyithu Hluttaw eng hatlakna hoh soe Pyithawngsuh hluttaw a pha puei kana  President U Htin Kyaw eng sen a thut oehtoe Aung San Suu Kyi ce rhampum poeknak peekung, State Counsellor bi ce bi hlue hue.