Mizo Thlang ang Ming Oehkoe "i" moe "a"

Nimoeh tlang thlang boeih Tibet, Mongoloid, Chhinglung, or Taluk (China) na koe eng kak lo nik tiikhi India moe Kawl kho ang lak a huma tloek oeh kho niksaa boeih ve tlang thlang ning ti rhu hue u. Thlangbok awina toe Tribal nina tina hue u.

Acekkhi boeih ce India rham Norh Assam oeh kho ak saakhi Bodo thlangphunkhi moe Nagaland, Manipur, Tripura , Mizoram , Chin doena ni. Ave nimoeh tlang thlang boeih eng ming ning sui rhu u ni teok lah oeh, nu phom pa phom moe pa chon, nu chon ce lo u noeh ani caa poetoeng ming ana sui khoei hue u. Ace mueihna a ning sui rhu oeh ce a ning ming oeh Pa phom ak chon moe Nu lam tungna koe mingkhi ce sui khoeina ana awm law hue. Nu ang ming lawha noeh Pa ang ming awm a loha a dawngoeh ang ming oehkoe eng Nu moe Pa ce nik ching tha hue.

Cenamoe Mizo thlangkhi ang ming toe Nu moe Pa a ning ming mueih noeh a duetnak, a hulamna Nu ang ming oeh "i" awm noeh Pa ang ming oeh "a" a awmnak eng ce Nu moe Pa ching thana awm hue. Hmueihtehnak oeh: Pa = Zoramhmangaiha, Nu= Zoramhmangaihi, Pa= Lalnunthara, Nu= Lalnunthari, Pa= Lalduhawma , Nu= Lalduhawmi , vekkhi oeh ve a ning ming mueih boeih moe soenum "i" moe "a" a awmnak ak cam eng, Pa ang ming duetnak oeh "a" awm noeh Nu ang ming duetnak oeh "i" a awmnak eng ce Nu ming moe Pa ming ching thana awm hue. Acoeh toe Tibet or China or Mongoloid na koe eng nik lookhi hah cu ikoe mueihna awm a ning ming ak loha huvoei aw?

Ave mueihna Mizo thlang ang ming oeh "i" moe "a" a awmnak ve thlangphun changkhi a hamna toe ikoe a xeenak amom moesoenum ningnih Chin thlangkhi a hamna toe a bet oeh a xeenak a awm a mueihna Chin thlang khawyah engtoe tuhdoena cor ak bah hue u. Dr. Lian Hmung Sakhong engtoe, " Mizo thlang eng Pa ang ming a duetnak oeh " a " ta noeh Nu ang ming a duetnak oeh " i " ani taaknak ak cam eng Chin thlang niniinak ni phlekkhi hue" ti hue.

British acoyah eng 1919 oeh India rham Assam oeh ce huenkung ta noeh North East India ( Tribal groups or Seven Sisters) ani ti ce ana uk law hue. Ace hui oeh Lushe ( Lushai, tuh oeh Mizo ni ti ce) thlang eng nimoeh ang ming a mueihna " i " moe " a " amna ta hue aning ming a duetnak oeh. Cenamoe 1935 kum oehtoe Luse rham ce Assam oehkoe uknak oeh amma thumnak a hamna awi qoelna awm law hue. Ace mueihna awi ak qoelkhi British thlangkhi eng Lushe ( Lushai or tuh oeh Mizo) thlang ve Nu ming moe Pa ming chingnak amma awmnak a dawngoeh, Nu moe Pa a ning ming oehkoe eng chingnakna ti noeh a hoei duet rhuet det rhet kho ana poek law hue. Ace mueihna a khawpoeknak oeh ak colo toe India Kalaa ( Vai- Mizo awi) thlang eng Ainu moe Aipa anik khuenak ming ce hu noeh Lushe thlangkhi a hamna hona hue.

India Kalaa thlangkhi eng Aipa ce "Murka" ti u noeh Ainu ce " Muraki" ti hue u. Ace Kalaa eng Ai ak khuenak oehkoe calung a duetnak Aipa " Murka " oehkoe " a" ce Lushe thlang pa ang ming a hulam oeh taak pe noeh Ainu " Muraki" a duetnak oehkoe " i " ce Lushe thlang Nu ang ming a hulam oeh taak pe ba hue. Ace a dawngoeh Lushe thlang ang ming ve Pa = Zoramhmangaih ce Zoramhmangaiha, Nu= Zoramhmangaih ce Zoramhmangaihi, Pa= Lalnunthar ce Lalnunthara, Nu=Lalnunthar ce Lalnunthari, Pa=Lalduhawm ce Lalduhawma , Nu=Lalduhawm ce Lalduhawmi ti noeh a ning ming ang sotnakna awm hue. Ace ce thlang vang daamnak ak pohkhi eng toe Lushe ming oehkoe "i" moe "a" ce "Chicken identity" "Ai chingnak" Ainu Aipa chingnak ni ti hue u.

Ve ak ca ve thekha huhsitnak a hamna yawk amni noeh sim ham tueng khuuikhing matna a awm a dawngoeh ka ning yaksakkhina awm hue.