Mdek Kho Oet ( Global Village) oeh Facebook honak konglam Yaksaknak

Ve a konglam ve ti vang, qoel vang ka tinak khawrhuet lawhoh hla hue, ni Dai thlangkhi cemueih tlukna vemueih a konglam ve ammak sim amawm ti huvoei ka ti oeh amka hlah lo ni. Cenamoe tuh oeh amka hlah oeh ammang coeng hlue a dawngoeh awi uel rhunak mat amueihna ka yawk lona awm hue.

Thlangbok awi na toe Mdekkhan pum ve Kho mat a mueihna awm lonoeh "Mdek kho oet' -'Global Village" ani ti u amueihna, khawmdek ak cawng ak ke oehkoe thlangkhi duet oeh Haidangnak (Facebook) lam oehkoe eng mat moe mat ning voem rhu noeh ni cawk ni can usoe nep phoeih hue. Cenamoe a vemueihna facebook ni honak oeh ve facebook khui oeh nak chan kawih ca, mueihlip( Datpung),Mueidangnak( Videos) khi boeih ve, namoeh a facebook oeh nak chan ham moe thlangboeih a huh hamna rhangpui eng a honak Facebook Group khui oeh nak chan ham ce ikoe mueihnum nik chan tueng tive ni sim hamna ngah hue. Chan hlue a loe loe ni tinoeh na huh a hoei, chan mailai yawk mailai eng ve phu amta hue.

1.Personal facebook; - Namoeh a facebook oehtoe na ngah a hoei yawk noeh chan tha huek te.

2. Facebook group;- Facebook group ve thlang khoyah eng a honakna awm hue. Ace mueih oeh mueidangnak niseh, mueihlip niseh nak channa a tlak oehtoe ace nak chan eng ace facebook group khui oeh ak awmkhi ce ikoe num a donak, a laeknak, moe cueihnak ani paek hluekhi tha tive ni poek lamma ngah hue.Ak awm a hoei chan hlue yap amni hue.

Ace a dawngoeh Facebook group( Media) thlang khawyah a honak oehtoe ca na yawk oeh, kak ca yawk ve thlangkhi ak khui oeh ak awmkhi a hamna ikoenum phu a tak hlue tive poek hamna awm hue. A lawng a lam kana " how are you?/ Na nik dip khi aw? / Daikhi/ Dai thlang" " my name is Mg Ba. I am studying....." ti tuktak a mueihkhi ve facebook group khui oeh ni yawk yapyap vetoe phu ammak ta ni. Facebook group khi oeh namoeh a kongkhi yawk yap yap ti khive, thlang eng ang yak tong num ammang yak tong num tive ni poek hamna awm hue.

3. Religious facebook Group;- honak konglam
Baeknak( Khrihca phunglam) a konglam ni seh, Khawsa phung lam tung oehkoe mueidangnak, mueihlip, moe awithang qoelnak, awi uelnak, moe mat moe mat thapaeknakkhi ve toe, Khawsa phunglam tung oehkoe facebook group oeh ve nik chan tha mantoe ak do soeih a long a lamna awm hue. Khrihca phunglam moe ang tuukai rhu toe, hmueihtehnak (example) oeh Global Dairam Christian Fellowship / Dai Youth Christian Fellowship ti mueihkhi oeh ve nik chan tha hue.

4.Media Facebook group
Mdekkhan khosak rhamsaknak moe mdekkhan a konglamkhi ve nik chan tha hue. Khawmdek khan oeh muengoi ikoe num a awm, awithang i num a awm timueih ve na ngah tokna chantha huek te.

5.Comment ;- Ca mhlatnak ( comment) oeh ve ni sim ham toe, ak choeina thlang mat eng ikoenum a ti, ikoe mueih mueihlip num ak chanlo, ikoe mueih mueidangnak num ak chanlo hue tice na teok cer dengoeh , moe ca ak chanlona a tlak oehtoe ace ak ca ce ak cerna na noet khoen deng oeh, ak chanlo a konglam moe angmueihna, awi doetnak, mhlatnak, oetnak, hatlaknak, thapaeknak, lungnak awice yawk tha huekte.A noet cer kana moe ang yaksim kana koem mhlat yap kop te.

Thlang mat eng mueidangnak, mueihlip, ca mat mat ak chanlo oeh ve ca mhlatnak ( comment) oeh ce mhlat kop te. Acoeh koem mhlat noeh ca channak ( Post) oeh nak channa a tlak oehtoe a kongchang nak teng lo a mueihna awm hlue hue.

Ace a dawngoeh ka Dai thlangkhi khawyah eng tuh oeh facebook nani honak oeh ikoe mueihnanum hailam lam ni pan lah voei tinoeh kawvatnak eng thapaeknak ka yawk lo ni.

Uem soeih hue nueng.