Donald Trump Eng Ikoe Mueihna Num Mee A Noeng

Donald Trump (Republican or Evangelical Conservative Khristian) moe Hillary Clinton (Democratic or Liberal Khristian) president mee cuhnaak oeh ikoe mueihna num Donald Trump eng a noeng hue ti ce ni teok lah ve u. Donald Trump eng ana ti hoeih hoeih toe Republican Party thlang ammak niikhi, kai eng Republican Party na ni xui lawkkhi kang nueng soe Republican Party ak thaa awmsak hue nueng ana ti ce tuh President tuehnaak oeh a takna ni hutha hue. 

Republican Party khui oehkoe a xamcaakhi thlangvang eng Donald Trump ce amngah unoeh cehta moe usoenum Party ak thaa awmsak noeh noengnaak hu toeng toeng hue. Ace mueihna noengnaak a huh hlue ce thlang boeih eng tloeih/ oer unoeh a hoeina a ning rhingkonaakna awm hue. 

Ak kaa oehkoe mueihlip ni huh a mueihna Republican ce ak thiim huen moe Democratic ce ak hip huen ni. A thiimnaak boeih ce Republican party eng a noengnaak huenna awmnoeh a hipnaak huen boeih ce Democratic eng a noengnaak huenna awm hue. Ace ce ni teok oeh Democratic / Liberal/ Hillary Clinton eng a noengnaak a hamna toe kho amsava hue. 

Ace mueihna Donald Trump/ Republican party eng ak kunu oeh ani noeng a dawngoeh Vice President ak bi hlue Mike Pence engtoe "Johnson Law" Johnson eng uknaak a hamna ana poh ce xer a hamna moe ak laekna Evangelical Conservative Khristiankhi eng Khawsa awitak a ning dueihpuei a mueihna pohna awm hlue hue ti hue. 

Ak poh hlue tha tang huivoei aw? Ace mueihna Amerika Court moe uknaak lam oeh Evangelical Conservative Khristiankhi a ngahnaak a mueihna ikoe mueihna a poh hlue num? Democratic Party thlang ammak sava upper Hlutdaw moe lower Hlutdaw oeh amsava soe cu. Ace mueihna ani pohnaak tha a hamna toe tuh oeh mueihlip ni huh a mueihna Upper moe lower Hlutdaw oeh ve Republican eng ak kuuna noengnaak ta hue u. Democratic or Liberal ce ammang tat hlue tha kawih a mueih tlukna noengnaak ani huh a dawngoeh Governor Mike Pence(Vice President) eng awi ak qoenna awm hue. 

Donald Trump moe Mike Pence awm amthawlh ampat ti kom amni ti thanoeh ammak soep thlangxingna ani awm lor a mueihna ani thawlhnaak, ani poh mxer khawyah awmlaw hlue hue cenamoe ningnih Khristiankhi a hamna toe Khristian thlangkhi dueihpuei nihnoeh ace mueihna noengnak ani huh ve uempuei hamna ak awm soeih matna awm hue.