Ca Nak Noer Khoei Aw: India Pa Ak Awi Ti Ngailah

Ca noer ve cueihnaak a kung ni ana ti hue u. Cauk mat ve ikoe mueihna amdo soeyom na honaak tha oehtoe na hamna cueihnaak anik pee matna awm hue ani ti ve thuemna mueih hue ti hue nueng. 

India pa mat engtoe Ca a noer hamna ngaih chim a lik noeh Cauk-im (Library) na ngoinoeh a teok hlue awm ak cuen ampe tha, amoeh eng cauk ak hlah hlue num tangka amta, cenamoe ca a noer hamna toe ngah hue. Kut-oet oehtoe mingthang soeih Sengimsang (University) mat Andra University (Andra Sengimsang) na ce ca ak teokna cet hue. Cauk a ngah soeih mat hunoeh, vat vang a ti ce cauk-im ak rhehkhi eng ampe hue u. Ace ang heup oeh ce a imna voei tlah hue. Cenamoe ang ngah amrhep hue.

A yar voen oehtoe ace cauk ak noer a hamna Cauk-imna cet ba hue. Ace cauk ce ak cuek oeh a noernaak anglak oeh ak laek soeih a mueihna ngairhu hue. A vah hlue awm amvah u, a coeh a teok oeh num amnoer boeih noeh a boetnaak oehtoe ace Cauk ce am mrhukna mrhu hue. Ace am mrhuk ce a imna cehnoeh ace muelam moe mthan oehtoe noer lor hue. Cenamoe a khongoi kho a daa lo oehtoe bi bi daa lawnoeh, a aok a aa hlue a suui ngah law soe Cauk ce rheng law kom tinoeh ak keenaak aih uet oeh Ceongkhuina khoem hue.

Acoeh koe engtoe a bi bi awm noet noet bak bak noeh Ca a noernaak hlue ak cuen ampe tha voen hue. Ace mueihna amma hoeng a dawngoeh Sengimsang (University) na koe Cauk am mrhuk ce kut-oet awm a teok kaana  kum 45 khui oeh ak ceongkhuina khoem hue. A huna toe poek lawnoeh Sengimsang na koe Cauk ka loh ve kut-oet awm noer hlan nueng kum 45 law vik hue, ave anglak oeh thlangkhi eng Ca ani noer mantoe ikoe mueih tlukna phu a taak hlue tinoeh ace ang heup oeh ce Andra Sengimsang (University) na ce thak tlah hue.

A coeh ce Sengimsang oeh Cauk ak rhehkhi eng awi ana doer unoeh, "ve ak cauk ve khawrhuet oeh thlang a hoei eng anak thoem law hue u, acena nang eng na imna na khoem a dawngoeh thlangkhi ani ngah soeih ca amnoer tha voen hue u, kum 45 khui oeh irhuet num na noer boeih" tinoeh doer hue u. Kut-oet awm amnoer hue nueng. Cauk noernaak hlue ak cuen rhoe rhoe amta nueng soe ni ti hue.

Ningnih Dai thlang toe ikoe mueihna ya? Cauk ve iyah na noer hoh? Ikoe mueih ak cauk na noer? Amna hoeng a dawngoeh cueihnaak a kung cauk a noer kana na awm laek aw?

India rhamna ka sengim kainaak oehkoe Cauk-im ni. 

 Ca Noer Koehni Ngak Ve U

 Ca uk ve Pueilaek soeih ni

 Ca noernaak ve Cueihnaak ni