Licang Dailand A Thoeng Lonak A Konglam

Hla boei lawnoeh,khawkda thai thai ni pha lawnoeh, Khaw kum, kum-oet coengoeh kum-oet khum law soe, ni hulam nim mhih noeh ni hailam tung doeng ni poek noeh, ang peong hoh ve nim mhih nim hangnak khawyah awm law hue. Hukum moe tuhhi, Tuhhi moe lohboet ammueih noeh poeknak sotnoeh ngaihnak ang sot khawyah awm law hue. 

Kum 2010, 2011, moe 2012  kum tloek oehtoe ngawihcunnak (Conference) ani pohnak tungna awm hue. Conference ve ak tungna toe Myanmar rham oehkoe tlang thlangkhi ngawihcunnak -Union of National Federal Council(UNFC) eng cut law ma hue. Ace ak huukhi Batu, Dai, Zomi, Chin, Zotung, Miram, K'cho/Cho/ Thlo,... eng poh law rhip rhip hue u. Ace ce ni ni Dai Nupa awina toe, "Kaei tlung soe huu ang Hai a cuna tlung kalak hue" anina tina mueih hue. Ani ti hlue, anik qoen hlue ammak awmkhi eng awm conference ve poh kalak usoe 2010, 2011, 2012, 2013 doenna conference kum ni ti soe ak xee hlue huvoei num!

Ace mueihna ngoihcunnak ani poh oeh ce Yahoo Group mail, Google Group mail, Facebook Group, moe  Facebook Messenger oehkoe eng yarhu unoeh umueih ak thlang ya ikoe mueihna ya matna ni awmpuei lah voei ti ce sui law hue u.  Zomi eng Chin ce Zomi tinoeh chot vang ti law soe, K'cho/Cho/Thlo eng Dai, Yah, Mkaang, Muem, Uppu, Daa tloek ve K'Cho na dueih hamna teng law hue u.

Ace hui oeh thlangvang Mindat tung Dai thlang, Kanpalet tung Dai thlang moe Paletwa tung Dai thlang eng ve K'cho/ Cho/ Thlo na dueih hamna ngah lona hue u. Cenamoe thlang vang Mindat, Kanpalet, moe Paletwa Dai thlangkhi eng amngah ba lor hue u. Ave a kong ve cuh ang boena amcuh unoeh ang xo rhoena xonak rhir oeh cuhna ana awm law hue. Muem thlangkhi moe thlangvang Dai thlangkhi eng Cho tinoeh matna ni awm soe toe, a hoei boeih matna ni rhup seh ti ce ngahna hue u. 

Cho/Thlo tinoeh matna dueih hamna ak ngahnakhi ang caanaak toe, ' thlangphun matna ni awm seh, Southern Chin State oeh thlangphun ang xoi soeihna ning duei seh' tinak ni. Ace mueihna dueih hamna a ning caanak ce Dai thlang koeh awm voen seh, Uppu, Muem, Daa, Yah, Mkaang koeh awm voen soe toe Cho/ Thlo/ K'cho doengna awm law soe toe, awi mat, ca mat ni honak u seh tinoeh caanak ani taakna awm hue. 

Ace ce kai eng amngah law hue nueng. Awicuh khawyah awm lawnoeh mat moe mat a hamna amdo law hue. Ace a dawngoeh kai eng "kaa cu Cho/ Thlo/ K'cho cu ammingna hlue kon hue nueng. Koeh ning ming pha law kom uk te. Kak thlangkhi cu amni hlah hluekhi hue nueng tinoeh, kaa cu Licang Dai thlang ni, Licang Dailand khui oehkoe ni" tinoeh nik thlang hunnakna ve Licang Dailand ve September 5, 2013 oeh ak colona awm hue. 

Licang Dailand ka nim mdueih peekhi oehkoe engni thlang a sit lo hue. 

Licang Dailand oehkoe khokhi toe: Liksoi, Suntui, Kalim, Kuepna, Haltu, Thlangplang(a), Thlangplang(b), Hultung, Rhamtuem, Koica, Omsoi(a), Omsoi(b), Tuiship, Plahrho, Vetve, Lungpang, Belkhoeng, Lungtui, Thotui, Rhawkthang, Ngapang, Duei, Oici, Aihca, Longdan, Buiship, Mitu, Buido, Vueilu, Mahtu, Khodo, Thungna, Khengca, Sihhleh, Pantui. 

Licang Dailand Eng Caanak

1. Dai thlang eng Dai thlangphun na dueih cek ham.

2. Dai thlang eng ni Dai awina ca yawknak tha ham.

3. Dai thlang eng ni Dai phun ni lungnak tha ham.

4. Dai thlang eng ni khawboe rhamlang ni simnak ham.

5. Dai thlang eng ni nupa thuum awmh-ih lungnak ham.

6. Dai thlang eng nik awina awithang yaaknak ham.

7. Dai thlang eng nik awina voem toei rhunak ham.

8. Dai thlang eng nik awi ni simnak ham.

9. Dai thlang eng Dai thlangphun ti ni sim rhunak ham.

10. Dai thlang eng pum-oetna kho ni saknak tha ham. 

K'cho, Cho, Thlo Ti Ve Ukhi aw?
K'chokhi venna Ca ka yawk

Ni Chin rham khui oeh khawsak rhamsaknak a do lo a mueihna thlang boeih eng ak thlang phun lungna noeh a tui a kho, ang tueinak moe am laung ak kaong ce hul law hue. Ace mueih lorna Dai thlang, Cho/ Thlo/ K'cho ( Muen) thlang, Mkaang thlang moe thlang phun changkhi boeih eng awm ani thlang phun ce hul law hue u.

Tuh oeh ve Group khui oeh  ak awm khui oeh huhnak yaknak ammang mueihkhi thlang khawyah ni. Ace a dawngoeh thlang chang ak khuui ak khing amna sim oehtoe awi a yap yapna koeh ti kom uk te. Mrhennak eng ka ning yaksakkhi ka ngahna awm hue.

Dai thlang ve Batu mlueh tung, Mindat Mlueh tung, Kanpalet mlueh tung moe Paletwa mlueh tungna ni awm hue. Ace khui oeh Batu mlueh tung moe Paletwa mlueh tungna ak awm Dai thlang engtoe "thlo or K'Cho" ti ve Muen thlangkhi ni, nina ti khoei hue u. Ace mueihna awm soe Thlo or K'cho ni ti u noeh, kheunak, ca yawknak koehna ni taaknak a hamna ni ngahnakkhi nueng.

Kanih tung Dai thlang engtoe "K'cho" tive "Thlo" ti u nueng. Chin ti hlue ang yueng oeh ve " Lai or Laitlang" ti u nueng. Suen oehkoe eng tuhdoena "Thlo or K'cho" ti ve amka ni honak a mueihna, kani ti oeh ce Mindat tung nak awm "Muen" thlangkhi ce "Thlo" ti u noeh anak khue law u nueng. Ace a dawngoeh K'cho or Thlo ti ve Muen thlangkhi ni. Thlo or K'cho ti noeh koehna nik khuenak a hamna ni ngahnakkhi hue nueng. Cenamoe K'cho or Thlo ve Chin rham or Lai ram pum khuenakna a awm oehtoe ave Lairam oeh kani awm lor a dawngoeh hatlakna hlue hue nueng. Batu, Mindat, Kanpalet moe Paletwa doengca Thlo or K'cho ti ve ammang coeng tha hlue kawih ni ti hue nueng. Ikoe mueihna awm soeyom "Thlo" ti ve Lai / Chin tlang pum tinakna amma nii oehtoe koeh ni thuum losak u tinoeh mrhennak thoeh law hue nueng.