Mdek eng Khawmik a Vaennak

***********************************

Suen oehtoe thlang boeih eng Mdek eng Khawmik vaen hue ti noeh amnak cangna unoeh a poekna yawm amna poek law hue u. Khawmik ve viin noeh ni awmnak mdek ve vaen hue ti unoeh ana poek law hue u.

India thlang Yajnavalkya eng (9th Century BCE) oeh anih doeng engtoe Khawmik eng ve khawmdek amvaen noeh khawmdek eng ni khawmik a vaen hue ti noeh ana ti law moe soe num thlang boeih eng a rho a tii ni ti unoeh amnak cangna hue u.

Greek thlang cuei Aristarchus eng (310BC–230 BCE) oehtoe tuh oeh ni awmnak mdeknu ve pihla, aisikhi eng vaen hue ana ti law hue. Cenamoe thlang boeih eng ani poeknak, aning ngahnak moe thuemsoeih hue ti unoeh anina poeknak, khawmik eng ni mdek ve a vaen hue anina tii lo a dawngoeh Aristarchus a ti awm amcangna hue u.

Greek thlang cueikhi Plato(428-348 BCE), Aristotle(384-322 BCE) moe Ptolemy(90-168 AD) tloek eng awm khawmdek ve pihla, khawmik moe aisikhi eng ani vaen uni ti unoeh anak qoel hue u.Ace hui oehtoe thlang boeih thlangcueikhi moe thlangrhokhi boeih eng mdek ve khawmik, pihla, aisikhi boeih eng ani vaen uni ti unoeh anak cang lona hue u.

U eng num mdek engni khawmik a vaen hue a ti? Corpernicus(1473-1543).

Kum 1543 oeh Tingchia ca sim(Mathematician) ani ti u Nicolaus Copernicus eng mdek eng khawmik vaen hue ana ti law moe soenum Khrihca lam oehkoe thlangkhi ani qihnakkhi a dawngoeh thlang khawyah a venna amqoel hue. Ace a dawngoeh Copernicus eng ve mdek eng ni khawmik a vaen tive ak cerna amnang dangsak hue.

Itali thlang mat khan lamtung a konglam ak simkung Galileo Galilei (1564-1642) eng 1609 oeh ave a konglam ve ana sui law noeh poeknak ana ta law hue. 1614 oeh Galileo Galilei ce thlang boeih eng a yap ak ti ni ana ti hue u. U eng awm ak awi tice ammak cangna hue. Ikoe tinoeh num ni ti oehtoe thlang boeih eng khawmik engni mdek ve a vaen hue ti unoeh aninak cangnak a dawngoeh ni.1616 oeh Khrihca lam tung oehkoe thlangkhi eng awm ace mueih awi ce koeh a tinak a hamna anam thawlh sui law hue u.

Ace mueihna khawmdek eng ni khawmik a vaen hue a tinak a dawngoeh anih ce kum 1632 oeh ak cauk a poh khoen oeh ce awiceknak taak pe unoeh ak awi ti ce ak khongnak a hamna thong anak thla law hue u. Cenamoe Galileo Galilei eng ak awi ti ce dueihpuei bak bak noeh a konglam cauk yawk hamna ang caa bak bak a dawngoeh imkhuina ta hue u. Galileo ce Florence ram, Arcetri kho oeh 8 January 1642 oeh ce thi hue.

Thlang boeih eng khawmik, pihla moe aisikhi eng khawmdek ve vaen hue u ti noeh poeknak, cangnak taak ta unoeng ani awm hui oeh Galileo engtoe a khup hletna Mdek, pihla, aisikhi engni khawmik ani vaen hue u ti soe thlang boeih ak koso noeh awicek unoeh thong thla unoeh a thihnak duet oeh imkhuina ana ta unoeh ana phepphoei law moe usoe num, a cueihnak, a simnak, a huhnak a tak aniinak ve mdekkhan thlang boeih nucaa nasen , thlangcuei, thlangrho duet oeh tuhtoe Galileo ak awiti ve thuem hue ti boeih hue u.

Tuh oehtoe Galileo Galilei ve ak oet ham kawih thlang mat awm amawm hue. Ace ce ni thlangcueikhi engtoe awi ana ti unoeh, "Ak thuem toe thlang boeih eng thawlh hue ti usoe yawm thuem noeh, ak thawlh toe thlang boeih eng thuem hue tinoeh cangna soe yawm thawlh hue" ana ti hue u.