Tuhngoi Cadawng Yawng Man Eng High School Oeh Rheng (Degree) Lo Hue

Pa Chui Ha a Capa, Cadawng Zawng Man eng Amerika rham, Taxas Pyine ,Dallas mlueh oehkoe, EMMTT J.CONRAD High School oeh Sengim boeih tha soe uempuei ham soeihna awm hue.

Cadawng Zawng Man ve kutdonak 6 hunoeh teokkhennak (Scholarship) awm khawyah hu hue.  Anih ve Global Leadership oeh awm Hoby Certificate mat ana hu lawnoeh kutdonak a huh tloek ve 6 law hue. Hailam a cehnak hlue moe a bibi hlue, a sengim kaihnak hlue oeh a donak qxoer qxoer ahamna Pa Khawsa venna cuekcahnak eng ni simpuei rhiprhip ve u. 

Cadawng Zawng Man, A Nupa moe a Naakhi

Cadawng Zawng Man eng a huhkhi Kutdonaak
Cadawng Zawng Man ve Top 5, Top 10 khi oeh ak awm hoeih hoeih hla ni tuhhi kum ve tangka lam oeh ani voetvai bet a dawngoeh Top 20 oeh Sengim mcoeng tha hue.

Deum Khawhleu Eng Lungtui Kho Oehkoe A Xernak

May 30, 2017 oeh Khawhleu eng Lungtui kho oehkoe Imkhi, Khaaakhi a xer doeng amkhoek soe Sengim awm xee hue. Tuhhi kum toe a kum heunnak oeh Deum khohleu naa bet namueih noeh ni ace mueih papana imkhi, Khaakhi moe Sengim a cuna a xer hue.

Ace Deum khawhleu eng Im 22, Sangyakhi omnak im 6, moe Sengim mat xer sih hue. A culumna 29 xe hue.

Lungtui kho ve kaongna awmnoeh ni ni ti hlue num thlangvang a kho toe ace nak oeh kaong qxoerna im ak saakhi hla ni. Ikoe mueih ahna ace mueih papana cu ak xee viklang huvoei aw.

Ang Hihnak 21st Century Panglong Ngawihcunnaak

Ang Hihnak 21st Century Panglong Ngawihcunnaak (The Second 21st-Century Panglong Conference) ce hla 6 oeh kut-oet ani ti amueihna khawngoi May 24, 2017 oeh ce cutna awm hlue hoh hue. Ace Ngawihcunnak oeh ce NCA oeh ming ak yawk doeng amninoeh tlang thlangkhi ani culumna thuum hlue hue u. Cenamoe NCA oeh ming ammak yawkkhi toe awiqxoepnak oeh amthuum hlue tha hue u. 

Chikha Oehkoe Eng Paletwa Lam Ak Laek Soeihna Daeng Hlue Hue U

Chin pyine a xingtung moe a rhamtung tlonpan rhunak ahamna lam cehcon ve a kueinak khawyah a awm a dawngoeh May 14, 2017 oeh Hakha na awi ani qxoep u toe Chin Pyine a hang duetnak soeih Chikha moe a nuduetnak soeih Paletwa anglak lam ve ak laek soeihna 2017-2018 kum khuioeh coeng ahamna Pyine Wanci Pa Lian Luai eng ti hue.

2017-2018 khui oeh lam daengnak ahamna ting 57938.933 ce huhna awm hoh hue ti hue. Ace a dawngoeh lam tuh daeng hlue  Paletwa moe Chikha lam daeng hlue ve Hakha-Batu-Paletwa lam, Falam- Tidim- Tonzang-Chikha lam vekrhoi ve khawcui khawxoi tlonpan rhunak ahamna ak laek soeihna daeng ahamna caana hue u. 

Ve lam ve ang xoina daeng unoeh kattaya awm ani poh hlue poehoei ni ti hue u. 

President Donald Trump Eng Liberty University Na Ak Awiqoen

Yanoeh Amerika President Donald J. Trump eng Liberty University oeh rhengsang (boih) ak lo hluekhi ahamna awiqoennak ta hue. Liberty University ve mdekkhan pum oehkoe Evangelical khristian sengim khui oeh ang xoi soeihna awm hue. 

Acoeh awi ak qoen toe: "Plymouth na Khawsa baekna ani ceh oeh ce cuekcahnak ta hue u. Ak suenkung eng loeihnak awi ak qoen oeh septakung avenna phlinin cuekcahnak ta hue, ikoe tinoeh num ni ti oehtoe Amerika rhamna ve coyah ak baek amninii noeh Khawsa ak baekna ni awm hue. Ace a dawngoeh ni xuikung ahamna anik tuehkhi eng cuekcahnak ani taak oeh Bible ak khan oeh ani kut tloeng unoeh 'Khawsa nik puei lah' ani ti unoeh yungna awikamnak ani taak hue u"

"Ace a dawngoeh ni Amerika tangka eng ak khue puei toe, 'Khawsa kani uepnak' (In God we trust)' ni ti hue. Ace mueihna awm soe nik khue puei toe Khawsa a kut kaa oeh thlangphunna ni awmnak ni" ti hue. 

Ace ce Rev. Franklin Graham, Evangelist mingthang Dr.Billy Graham a capa engtoe tinoeh "Uem soeih soeih huenueng, ave mueihna nik thlangphun oeh Khawsa ve ak tungna a awmnak khuikhing yasimnoeh Khawsa ve nik thlangphun oeh ak tungna ak simkung ve" ti hue. 

Yangon Na Bus Pha Law Xer Hue

Yangon na Taluk eng a seh Bus khawyah May 12, 2017 oeh pha law xer hue. Ace Buskhi ce ရန္ကုန္ၿမိဳ႕ ျပည္သူ႕ရင္ျပင္၀န္း oeh ta usoe iyah tang num a lo hue ti toe ang coeina sim hlan hue u. Ani tinak oehtoe 200 hla ak lo voeina ti hue u. Tuh ak pha lo Buskhi ce Yangon Bus Service (YBS) ahamna ani honakna awm hlue hue. Cenamoe thlangvang engtoe Taluk Bus na awmnoeh amlaek ti voe, ak thla tookhi eng cu Japan Bus anik thlah mantoe ti unoeh poeknak ta hue u. 

Veve Omni Focus ကုမၸဏီ eng a holo ni ti hue u. 

Myanmar Rham Eng Laeknak Pan Hue: Peace Talk

Yanoeh Myanmar rham rhoepnak a kong anik qoen toe ka poek oeh hailam pannak moe a donak hlue Federal uknak hlue lam pan hue ti ce huhthana awm hue. Ave mueihna ani poh tang oehtoe ni kho ni rham eng hailam pannoeh laek law hlue bet nganga hue ti ce ngaih-unak awm hue.

Myanmar rham khuioeh Pyine qxih (7) eng animoehkhi moe animoehkhi pyine ahamna upade ce animoehkhi rhoe eng ani pohnak ahamna Myanmar rham rhoepnak qoenkung a bawng UPDJC eng hatlaknak ta hue.Ace mueihna a ning hatlaknak toe Mva moe tlang thlangkhi ning mueihnak ahamna ni ti hue u.

Ace tengtumnak oeh Pa-oh National Party oehkoe Bohmuci Khun Ukka eng "Pyine eng upade poh thanak ani paekkhi ve nimoeh moe nimoeh uknak tha ani paekkhi ni" ti hue. Tuh Pyine eng upade poh thanak ani paekkhi ve ammanak awm khoei moe ak cueknak Myanmar rham oeh ani paekkhi ni ti hue. 

UPDJC eng ngoilam anik qoen u toe khorham uknak a konglam oeh mueihnak rhip, nimoeh moe nimoeh poh thanak, Federal pyine mdueihnak, Democracy party ak laek ang dueihnak ahamna teng hue u. 

Ace mueihna upade ani poh ce 2008 upade moe koeh ak lengkah kawihna ani pohnak aham, a lenkah hlue oehtoe Myanmar rham pum oehkoe upade akkai oeh ani honak ahamna hatlaknak ta hue u tinoeh Khui Ukka engtoe qoen hue. 

Pyine khui oeh ani poh upade moe ang mueihna bi ani bi, Pyine coyah, pyine hluttaw, Pyine awiceknakkhi boeih ve pyine eng uknak ani poh amueihna a ning uk rhu ve Myanmar rham pum coyah eng amcor tha hue ti unoeh hatlakna hue u. 

Ace mueihna pyine khui oeh moeh moe moeh uknak tha upade poh ahamna ani teng oeh ce rhankap eng koengqengnak ham"“ခွဲမထွက်ရ” ti ce, Myanmar rham khui oehkoe eng koeh anik connak ahamna awilung ak consak ve Bohmuci Khui Ukka engtoe "ang mueih ang tehna khosaknak ti ve Myanmar rham khui oehkoe eng connak amninoeh, con u ti soe toe hoena ikoe pohna kanik con hluekhi num, con u ti soetoe u hoena ak con hlue num ti hue. 

Myanmar rham ang ming awm hailam oehtoe Federal Pyithawngsuh Myanmar tina awm lawnoeh Rhankap ve toe Pyithawngsuh Rhankap tina ni a awm hlue toeng toeng hue. 

Dai Rham Oeh WiFi Hona Hoh Hue U

Kawpoekna ak kuei toe amning muei amning mangnakkhi ni Dai rham khui oeh ni holonak ve ni. Phone doeng laek num ni holonak ka ti WiFi doenna ni holonak hlue tha ka poek oeh kawpoekna kuei qxoer qxoer hue. 

Ak xuem oehtoe Boikhi, mangkhi eng va Phone ta usoe, tuh toe ni Dai khona pateng phone ni luem lonak ka poek oeh ngahnak kuei hue. Ni kho ni rham uknak a laek bet mantoe Mawtawkhi pha noeh, Maa (electric) khi ak ca'ang hlue eh eh hoh hla ni. Cenamoe hailam ikoe mueihna a awm lo hlue ti ve amni haksim hue. 

Tuh WiFi ani honak ning yak toe Sihleh kho oeh Facebook messenger honak thana awm hue ti hue u cenamoe amlaek cer hue. Licang tlangna koe engtoe laek bet huvoei ti hue u. Ace mueihna Licang tlangna koe eng WiFi ni honak hlue tha oehtoe Facebook Live ve Licang Mcung oehkoe eng ni hlah hlue tha hoh hue. 

Licang mcung oeh Phone tung ning ling mantoe nimoeh tung toe phone eng ni veok rhu thanoeh internet / WiFi awm ni hona hlue tha na mueih hue tinoeh poek hue nueng. 

Muslim Thlang 200 Bibi Duemsak Hue U

Amerika na Somalee Muslim ani ti a bawng ce ani bibinak Cargill Inc. ani ti Meh ani thaknak Company mat oeh bi ak bikhi ce bibi duemsakna awm soe, ca yawk unoeh mrhennak thoeh tloei usoe amni lutsakkhi tlah hue. Ace Muslimkhi ce Amerika rham Colorado pyine oeh bi ak bikkhina awmnoeh animoeh Muslim a baeknak amueihna huep-oet phlinin ani khawsa ce baek ahamna company eng ang hatlaknak ahamna thoeh hue u.

Ace mueihna anik thoeh oeh ce Company kungmah eng thlang boeih angmueih angtehna duemnak kani paekkhi ni, nangnikkhi doeng ce amni kuusakkhi ti kong tinoeh bibinak oehkoe eng a ning duemsakkhina awm hue. Ace mueihna nangnikkhi doeng duemnak ak ku kani paekkhi oehtoe ammueih amteh soe thlang boeih ahamna amdo hlue hue tinoeh kanik consakkhi ni tinoeh company kungmah engtoe qoen hue.Ref: Law Ka Nat