Dai Awina Veve Ikoe Num Ni Ti

Veve ka huh oeh dosak chim a lik huenueng. A hiihluepna awmnoeh lungnak cu boe hue. Ang ming ve ni Dai awina ikoe num ni ti huvoei, ni kho ni rham oeh ak awm lor huvoei num amka huh khoei hue.Veve Mva awina toe ပယင္း ti hue u.

The Fourth Dai Conference Oeh Chin Vuanci Salai Isaac Khen Kai Hue

Tuhhi kum Ak Phlinak Dai Conference (The Fourth Dai Conference) ce Kanpalet mluehna poh usoe thlang khawyah ace Conference oeh ce kai tha hue u. Ace Dai Conference April 28-30 doe ani poh oeh ce Chin Pyine Vuanci Salai Isaak Khen eng ce ni hona pueikhi noeh Dai thlang eng hailam ni pamnak tha ahamna moe ak laekna ni mi nik thlang, ni kho ni rham ahamna kho ni poeknak ahamna awi uennak ni taak pekkhi hue.

U A Kut Yawk Num Ak Che Soeih

Veve teok unoeh noer lor lah u, nang ya hlue sim huvoei num, nak noer tha hlue huvoei num? Ve Siboi eng Si-im na koe Simpueinak ca thlang mat a paek hla ni, anih eng amnoer tha noeh Viber Group khui oeh ni poh pe u amsim khinglik hoh huenueng ti soe, u eng awm amnoer thanoeh ikoe awm amti pe hue. A sengim kaihnakna Sangyakhi nik thoehkhi soe amsim nueng ti pe hue u. 

Ave ak ca ve thlang chang khawyah mhuh soe u eng awm amti pe tha hue. A huna ce Siboi a yawk cu Siboi eng ni a sim hlue ti pe usoe India rhamna koe Siboi mat ce ve ak ca pat soe anih eng ce ak laekna yawk pe tlah hue. 

Ave ni poek oeh kut yawk ak che soeih soeih toe Siboi ni ana ti hue u. Ikoe mueihna ak awm Siboi toe a kut yawk ak che huvoei aw? Siboi a kut yawk a saernak toe ca ani congoeh Sangya eng a ti ak qoen a hoei ce kut eng ani yawknak tha khui oeh yawk ahamna aning caa a dawngoeh ace mueihna ani yawk ce cehphlueih usoe ani kut yawk ak chena awm hue.

Nawm / Naum ve u awi num?

Dai thlang eng ang hihnak oeh thlangchang ak awi ni honak ak doem soeih toe "nawm" ti ve ni. Nawm tinoeh ni yawk hoeih hoeih ve u ak awi huvoei aw? Ni nupa (Dai awi) ak awi tang huvoei aw? Ikoe mueihna a lonak a long a lam a awm huvoei soe.

Nawm: Thlang vang engtoe "nawm" tinoeh yawk soe, thlangvang bai engtoe "naom" tinoeh yawk hue. Ave ve hoenakoe awilung, u ak awi oehkoe ni loh num? ti ce ni teok lah ve u.

Nawm Ni Honak A Long A Lam

-----------------------------------------

Nawm tinoeh ni honak ve awilohhawi takna toe "Naom" tinoeh ni cehpuei hue. Veve nik awi cehawi amni, nik awina "nawm" honak ve a haa ni.

(a). Nawm= Nawm kon hue.

(b). Nawm= Nawm boehloek hue.

(c). Nawm= Nawm soeih hue ukte oe.

(d). Nawm= Nawm chim a lik hue.

(e). Nawm= Nawm laek aw?

(f). Nawm= Nanik nawmkhi aw?

(g). Nawm= Nawm hue boe,...

Dai awina "Nawm" Ve a Long a Lam Takna Toe

-------------------------------------------------------------

(a). Nawm= Nukdoem a Sana noeh "nawm" khinglik hue.

(b). Nawm= Ka Uipa uirhai tlungnoeh "nawm" khinglik hue.

(c). Nawm= Ka soeipa minna teongnoeh "nawm" khinglik hue.

(d). Nawm= Nula Dai Par toe ang hii naa "nawm nawm" vik hue.

(e). Nawm= Nula na awmnoeh a "nawm nawm" tloekna ni boe.

(f). Nawm= Nula Nula na awmnoeh aomnaa "nawm nawm" hue.

Nawm ve U awi num?

________________

Nawm ve Hakha, Falam, Mizo awi oehkoe ak lo awilung, Hakha eng "Nuam" a ti ve Dai thlang eng "nawm" na nina hona noeh ni. Hakha awi oeh "nuam" ani honak a long a lam a bet.

(a). Nuam= Nan nuam tuk e, A nuam tuk e.

(b). Nuam= A nuam ngai si, Kai nuam ngai.

(c). Nuam= Nan rak nuam pah maw?

(d). Nuam= Nan sinah um cu kai nuam ngai si.

(e). Nuam= Nuam law law si e, nuam ngai.

Dai Awina Toe Ikoe Num Ni Ti?

________________________

Hakha awi "nuam" ti ve "Nawm" tinoeh ni honak ve ni Dai awina toe "omxa" ti ni.Awi cehhawi Honak a long a lam a bet dangsakna awmhue.

(a). Omxa= Omxa kon hue oe.

(b). Omxa= Omxa soeih soeih hue.

(c). Omxa= Tuhngoi toe omxa soeih hue oe.

(d). Omxa= Tuhhi kum Khrismas toe omxa soeih hue.

(e). Omxa= Dai Christian Youth Fellowship omxa soeih hue.

(f). Omxa= Paipai duumna omxa soeih hue.

(g). Omxa= Ka nupa hu nueng omxa soeih hue.

(h). Omxa= Yangon toe omxa soeih hue oe.

(i). Omxa= Ni Dai kho ni a omxa bakbak hue.

(j). Omxa= Jesuh Khrih xingna ta nueng omxa soeih hue.

(k). Omxa= Jesuh moe matna awm doeng doeng ni a omxa hue.

Ni puei Dai thlang vang engtoe "omxa" ve "omphya" tinoeh hona hue u. Ani honak ve ak choei oehkoe Omxa a huen oeh honak hlue ni.

(a). Omphya= Omphya langlang ki ni.

(b). Omphya= Omphya soeih ve boe.

(c) Omphya= Omphya ki ni,...

Hman

Hman ve ikoe awi num, ni Dai awi num? Batu awi num, Hakha awi num, Falam awi num?

Dai thlang eng ni Dai awi nim mhih lawnoeh thlang chang ak awi nik awi amueihna nucaa nasen, a xii a xam eng ni holona kalak noeh ni awi aihchai ni non law vik laek hunum ka ti!

Hman Honak A Long A Lam

-------------------------------------

Hman ve Hakha, Falam awi ni. Ak qxuem oeh Hakha tung ak awi ve ak kuna nina honak a dawngoeh nik awi amueihna "hman" nina hona viksoe ni. Hakha awina= A hman ngai, A hman tuk, nan hman e, Zeitindah nan hman, Na hman ngai e,..." ti mueihna ce hona hue. Mahhi hman ko, Na hman khawh maw, Hman a nuam ngai, Khrismas kan hman, Zeidah u.

Ni Dai awi eng a voetta, ni Dai

awi oeh ammak awm toe thlangchang ak awi ve ni Dai awi amueihna ni hona tha hla hue, ni Dai awi omloei soe thlangchang ak awi ni awi amueihna ni honak ve ammak thuem, ammak dona awm hue.

Tuh Dai thlang eng

"hman" ni honak ve ni Dai awina toe pakhihna awm hue. Ve akkai oehkoe mueihna Dai thlang eng "Hman" awilung ve nik awi amueihna ni hona soe ni Dai awi oeh ikoe mueihna num nik awi a awm ti ce a betca dangsakna awm hue.

1. Hman (Hakha awi)= Thuem (Dai awi)

(a). Thuem hue (Dai)= Hman hue (Hakha awi)

(b). Na ti thuem hue (Dai) = Na ti Hman hue (Hakha)

(c). Ak thuem awi (Dai) = Ak hman awi (Hakha)

(d). Thuem sarhi hue (Dai) = Hman sarhi hue (Hakha)

(e). Thuem soeih hue (Dai) = Hman soeih hue (Hakha)

(f). A ti thuem hue (Dai) = A ti hman hue (Hakha)

(g). Thuemsak soeih huenueng (Dai) = Hmansak soeih huenueng(Hakha),...,

2. Hman (Hakha awi) = Honak (Dai awi)

(a). Nak hona hlue aw? (Dai) = Nak hman hlue aw? (Hakha)

(b). Khrismas nak hona hlue aw? (Dai) = Khrismas nak hman hlue aw? (Hakha)

(c). Ikoe nanik honakhi aw? (Dai) = Ikoe nanik hmankhi aw?(Hakha)

(d). Tui nak hona hlue aw (Dai) = Tui nak hman hlue aw (Hakha), ...,

The Fourth Dai Conference 

Tuhhi kum Ak Phlinak Dai Conference ce April 28-30, 2017 oeh Kanpalet mluehna ani poh hlue oeh ce ningnih tung toe ikoe awm amni poek soe ni pueikhi Mindat tung toe anik kona sae hue. 

Hailam a yar oeh ani poh hlue "Ak Phlinak Dai conference" ce ni hu kum oeh Am Thumnak Dai Conference, Thingkong kho oeh ani poh oehtoe Batu oeh poh ahamna anak qxoep law hue u. Cenamoe umueih tloek eng num Kanpalet tungna anik chot a dawngoeh Mindat tung anik kawse hue. Ikoe mueihna awm soe huvoei aw?

Ace Ak Phlinak Dai Conference eng ve ikoe num ak con lo puei hlue, ikoe mueihna awm soe Batu oeh poh hlue cu Kanpaletna ak chotkhi num, pongcaanak ta paka unoeh ni acena anik chawt hue ti ce khawyahna poekna awm hue.  

Nimoeh Siip Dai tung toe ikoe awm amni poek lih soe Mindat tung toe tuh ani poh lo hlue Dai Conference eng ikoe num ak con lo puei hlue ti ce hakpoek hue u. Mindat tung eng ce tuhhi kum Batu oeh Dai Conference a awm hamna ngahna hue u.

Nina teok lah ve u, ninang ngai lah ve u. Ikoe mueihna toe awm law hlue hunum. 

Asia Rham Khuioeh Baptist Baekim Angxoi Soeih

Asia rham khuioeh Baptist Baekim angxoi soeih ve voeh ni huh amueihna awm hue. Ace ce Nagaland rhamna ni a awm hue. Baekim ang ming toe Nagaland rham Hunheboto mlueh Shumi Naga Baptist Baekim ni.

1. May 7, 2007 oeh cut unoeh March 31, 2017 oeh coeng hue u.
2. A Saknak India tangka 36 crore (360000000/- Rupee
3. Thlangmi ang pum tha ham 8500 khoek hlue hue.
4. Tuinu Yama na koe eng ang sang pee 1864.9 meter sang hue
5. A yuung 203 pe, Ak daang 153 pee moe ang Sang 166 pe.
6. A pum ang xoi ce 2373476 pe
7. April 22, 2017 oeh ce mhawng hue u.

Rhavang Pailukluk Hoh Hue

Khawchik boeih noeh Khawxai phalaw noeh tlangna ning mang soe maamuikhi huep cakcak soe, chuca phaca eng tuikung, thingkung pan unoeh thingthah, rhawmpu a kungna awm law usoe, thingpai rhopaikhi qit lawkang noeh thingso na ni hakteok soe Rhavang ak naai pailukluk soe oe, ni loh hlue awm ni haiya, amniloh oeh num ni haiya, 

Dai Bolung Msuihnak Oeh Ak Cetkhi Sanke

Ni kho ni rham Mawtaw Sanke eng pha lawnoeh lamceh a bet oeh ak yoei lo amueihna awmhue. Ve Dai Bolung am msuihkhi eng Sankee ani taak ka huh oeh ni Dai rham khui oeh Sanke iyah num a awm hoh huvoei tinoeh kho ni poeksak hue. 

Dai Bolung Msuihnak 

Tuhhi kum Dai thlangkhi bolung msuihnak ve Kanpalet mlueh tungna Macia-imnu kho oeh msuihna awm hue. Tuhtloek ve msuih huilina awm hue.

M.P. Hon Kheng Mhihdamnak Lungsuem Ahamna Tangka Coikhi Venna Jen Awiqoennak

Dai Youth International (D.Y.I)ang ming eng nani venna jen awiqoen law huenueng.

Tuhhi kum January, 5 oeh  a poek kana ni Dai thlang M.P. Hon Kheng, Pyine Hluttaw eng a ning khumtakhi a dawngoeh Mdekkhan pum oeh ak awm ni Dai thlang boeih kawsaer mikphli eng ni awm hue. Ace mueihna kawsaernak doeng amkhoek soe mhihdamnak (memorial) Lungsuemnak ahamna tinoeh tangka a hai kana ak coikhi boeih ak khan oeh jen awiqoen huenueng. 

Aktungna ak cuek soeih oeh Mhihdamnak Lungsuem ni poh useh tinoeh awi ak hlah lokung Salai Choi Reng(USA), moe Saya Aung Lian (Yangon), Pa Ha Khawng (USA), Pastor Pa Tem (USA), nanik khan oeh jen awiqoen hamna ngahna hue nueng. 

Ang hihnak oehtoe Tangka coi ahamna ani bibi non unoeh thaa ak lokhi Pa Ha Khawng (USA), Pa Lian Thawng (USA), Pa Ya Hee (USA), Pa Chui Ha (USA) , Pa Tam Choi (USA) Pa Davit Paya (Denmark), Pastor Boi Na (Malaysia)  moe ak changkhi boeih ak khan oeh jen awiqoen ba huenueng. 

Am thumnak oehtoe tangka boeih ce a bung a tlep pai awm ak doh kana uep-omna ni kho tungna tangka anik paek peekhikung Pastor Rheng Hu(Yangon) ak khan oeh jen awiqoen hamna ngah huenueng.

Ak phlinak oehtoe Mhihdamnak Lungsuem ahamna pawngcaanak ce tlongthoh ahamna moe poh hlue bi hlue kawih poh ahamna ang tlongthokhi Dai Christian Youth Fellowship (Matupi) moe Mhihdamnak Lungsuem a coengnak ahamna pum ak peekhi boeih Pastor Lian Bik, Pa Ham Toe, Pa Thang Om moe Committee boeih ak khan oeh jen awiqoen hamna ngah huenueng. 

Hailam oeh awm ave mueihna mat moe mat thapaek rhunak, bomboeinak oeh thaa ni taaknak qxoer qxoer ahamna ni ngahnakkhi huenueng. 

Dai Youth International (D.Y.I) eng tangka ni coi boeih ce voeh ak kaa oehkoe amueihna dangsakna awmhue. Tangka ang tuna toe nimoeh tangka 94,78,444 Kyats pha hue.

Chin Pa Eng Myanmar Rham Pum Oeh Donak Kutdonak Hu Hue

Chin pa, Thantlang peng Sopum kho oehkoe Cadawng Benny Van Bawi Thawng, kum 17 eng Myanmar rham pum oeh Cadawng thlangdo mueidangnak  ang hihvoeinak ce Mandalay oeh April 4-8 poh usoe ak cueknak hu hue. 

A Pa ve Rev. Dr. CK. Hrang Tiam, MEGST oeh Sayaci ak bi moe a Nu toe Nu Rebeca Rem Ruat eng ani capa na awm hue. 

Benny Van Bawi Thawng ve Yangon Bahan oeh Step Center Academy oeh Sengim kaili hue. 

India Rhamna Ka Baibun Sengim Ka Kaihnak Qxuem

Tuhhi kum toe South India rhamna Baibun Sengim ka kainak oeh 31st Commencement Exercises March 10, 2017, rheng(Degree) paeknakna awmnoeh ak laek soeihna ak omxa soeihna hona hue u. 

Ve a Baibun Sengim ve Acre  25 lawnoeh ak khuina Im 40 moe Baibun Sengim oeh Rheng (Degree) ani paekkhi ce B.Th., B.RE., B.D., M.RE., M.Div., M.Th., D.Min., rhengkhi ce paekna awm hue. Biblical lam tungoeh ak tung soeihna dueihpuei unoeh Hebrew awi moe Greek awi ce amni sim oehtoe rheng amni loh hlue tha kawihna poh hue u. 

Anghihnak oehtoe Congpueinak paxa (Ten Doctrine) ce ak tungna cehpuei unoeh ace Congpueinak paxa amni sim oehtoe Rheng ve amni loh hlue thana awm hue. 

Ace Baibul Sengim ak khuina ce Coyah sengim ta ba unoeh Tangxa doena congnak awm hue. 

Baibun Sengim ang Ming toe South India Baptist Bible College & Seminary (SIBBC&S)

Khoxai Lawnoeh Korea Rham Paipai Dumna Ploeh Hoh Ba Hue

Korea rham toe Khawkchik, Khawxai, Khawmduem, Khawcui ahoei oeh amma omxatnak amom hue. Tuh toe khoxai law hoh ba soe Korea rham ve paipai dumna ploeh law hoh ba hue. 

Khoxai oeh khoxai oeh awm omxa, khawcui oeh awm omxa, Khawchik oeh awm omxa, khawduem oeh awm omxa noeh ani kho ani rham a laeknak ak cam eng lawng a lam doena laek noeh omxa soeih hue.